Li Wanê di 23yê Cotmeha 2011an de bi pileya 7.2yan erdhejek xedar çêbû û di vê erhejê de 644 welatiyan jiyana xwe ji dest dan û nêzikî 2 hezar kes jî birîndar bûn. Bi ser vê erheja xedar re 15 sal derbas bûn.
Li Wanê di 23yê Cotmeha 2011an de erdhejeke xedar çêbû ku navenda erhejê gunde Sosrat a girêdayî navçeya Tûşbayê ya Wanê bû. Mezinahiya erdhejê bi 7.2 pile bû û di serî de navçeya Erdîşê li herême bû sedema karesateke mezin. Di erdheja 23yê Cotmehê û erdhejên biçûk ên piştî wê de, bi giştî 644 welatiyan jiyana xwe ji dest dan. Nêzî 2 hezar kes birîndar bûn û bi sedan kes jî di bin kavilan de bisaxî hatin rizgarkirin. Li seranserê bajêr nêzî 140 hezar avahî zirar dîtin, ji van 40 hezar avahî wekî xisarên giran an jî bi temamî hilweşiyayî hatin qeydkirin.
Erdheja 9ê Mijdarê
Gava ku hewl dihat dayîn birînên erdheja yekem werin pêçan, di şeva 9ê Mijdarê de erdhejeke din a bi pileya 5.6 ku navenda wê Artemetan bû pêk hat. 25 avahiyên ku di erdheja yekem de zirar dîtibûn û Otela Bayram jî di nav de bû, bi vê erdhejê hilweşiyan. Di vê rûdanê de jî 41 kesan jiyana xwe ji dest dan. Li gorî daneyên AFADê, enerjiya ku di erdheja sereke ya 23yê Cotmehê de derket holê, 33,2 qat ji bombeya atomê ya ku avêtin Hîroşîmayê bi hêztir bû. Di mehên dûv re de li herêmê zêdetirî 11 hezar erdhejên biçûk jî hatin qeydkirin.
