Amed – Desteserkirina pirtûkên Weşanxaneya Aramê ya li Fuara Pirtûkan a Amedê didome. Xwediyê Aramê Hakki Boltan nerazîbûn nîşanî desteserkirinê da û got: “Ev êriş û desteserkirin hatine plansazkirin. Desteserkirina pirtûkan êrişa li ser azadiya ramanê ye.”
Li Amedê 8emîn Fuara Pirtûkan ku bi pêşengiya Odeya Bazirganî û Pîşesaziyê ya Amedê (DTSO) û TUYAPê tê lidarxistin, ji roja 30yê Mijdarê ve didome. Ev sê roj in polîs bi ser standa Weşanxaneya Aramê de digirin û pirtûkan desteser dikin.
Polîs vê sibê jî bi ser standa Aramê de girtin û pirtûka “Efrin Direniş Günlüğü (Rojnivîska Berxwedana Efrînê)” a Hatîp Dîcle desteser kirin.
Di nava sê rojên dawî de heta niha pirtûkên, “Özgürlüğe Giden Uzun Yol, Abdullah Öcalan’ın önsözüyle birlikte, Nelson Mandela (Rêya Dirêj ku Diçe Azadiyê, bi pêşgotina Abdullah Ocalan, Nelson Mandela)” ku qala otobiyografiya wî dike, “Mektuplar ve Yazilar (Name û Nivîs)” ku nivîskarê wê Mehmet Hayrî Durmuş e, “Dildarê Serkeftinê” a Mahmut Aba ku ji Weşanên Aramê derçûne hatine desteserkirin.
Nivîs li şûna pirtûkan hatin bicihkirin
Xebatkarên Weşanxaneya Aramê li şûna pirtûkên hatine desteserkirin û vala man e, nivîsa “Pirtûkên me yên bi rêyên derhiqûqî hatine desteserkirin” bicih kirin û ev nivîs li ser standê balê dikişînin.
Xwediyê Weşanxaneya Aramê Hakki Boltan li ber standa weşanxaneyê ji ajansa me re axivî û nerazîbûn nîşanî desteserkirina pirtûkan da.
‘Êriş û desteserkirina li ser azadiya ramanê ye’
Hakki Boltan bi bîr xist ku êrişên li ser Weşanxaneya Aramê ji berê ve heye û heta îro berdewam dike.
Hakki Boltan diyar kir ku ji roja destpêka Fuarê ve polîs standa weşanxaneya wan kirine armanca xwe û got: “Tê xwestin ku însan, xwîner bên tirsandin. Dixwazin li ser standa me dan û standinek neyê kirin. Ev sê roj in pirtûkên me desteser dikin. Pirtûkên ne qedexe ne, tên desteserkirin. Polîs bi xwe jî dibêjin, em dibin lê hê qedexeya wan nîn e. Yanî pirtûkên ku nehatine qedexekirin, lê mixabin dibêjin em ê bibin qedexeya wan derbixin. Polîs ketine şûna dozger û dadgeran biryaran dide. Ev xuya dike ku di navbera xwe de axivîn e û plansazî kirin e. Plansaziya êrişa li ser Aramê bi rêxistin dikin. Em bi êrişan re rû bi rû ne. Wisa xuya dike ku heya fuar bidome, dê êriş û desteserkirina pirtûkên Aramê bidome. Em bi tu awayî viya qebûl nakin. Desteserkirina pirtûkan êrişa li ser azadiya ramanê ye, êrişa li ser ziman û çanda Kurdî ye. Êrişa li ser pêşketina raman û ronîkirina mirovan e. Em ê tu carî ji van êrişan re nebêjin erê.”
