Amed – Xebatkarên Termînala Otobûsan a Amedê diyar kirin ku bihabûna mazotê ji bo wan pirsgirêk e û ji ber vê yekê neçar in bihayê bilêtan zêde bikin û roj bi roj ew zirarê dikin.
Her meh du sê caran bihayê benzîn, mazotê zêde dibe. Bihabûna sotemeniya wesayîtan bandorek neyînî li ser xelkê dike. Herî zêde jî bihakirina lîtreya benzîn û mazotê bandorek zêde li ser fîrmayên otobusên nav bajaran dike. Her ku sotemenî biha dibe, biyahê heqê rêya nav bajaran hem a otobusan hem jî ya dolmîşan biha dibe.
Niha rojane li gorî herêma Amedê lîtreyek benzînê 56,68 lîreyî û lîtreyek mazotê jî bi 57,53 lîreyî tên firotin. Ev bihabûn bi awayekî otomatîk tesîrê li ser çûnehata rêwiyan dike.
Li gorî îro bilêtên fîrmayên otobusên ku ji Amedê diçin Stenbolê 1800 lîre ye. Her sefer û her roj ev biha dikare were guhertin. Her wiha heqê rê yê dolmîşên ji Amedê ku diçin Batmanê û Mêrdînê jî 250 lîre ye.
Xebatkarên Termînala Otobûsan a Amedê li ser pirsgirêkên aborî ku pê ve rû bi rû dimînin axivîn û gotin ku ew her roj zirarê dikin.
‘Em ji neçarî otobusan didin xebitandin’
Xebatkarê Termînala Otobûsan a Amedê Nîmet Tekdemîr diyar kir ku bihabûna mazotê, krîza aborî ji wan re dibe pirsgirêk û ji aliyê qezencê ve rewşa termînalê baş nîn e. Nîmet Tekdemîr anî ziman ku di van mehan de ew pirr zehmetiyan dikişînin û got: “Ji ber ku mazot biha ye. Îro erebeyeke me ku diçe Marmarîsê 70 hezar lîre lêçûna wê heye. Erebeyên me diçin û tên herî zêde 35 hezar lîre qezenc dike. Fîrma bi 35 hezar lîre zirarê dike. Ji ber ku mazot biha ye, bilet jî biha dibin û hejmara rêwiyan jî dikeve, rêwî nikarin bilêt bistînin. Beriya ku mazot û benzîn biha bibe, mirov pir diçûn û dihatin. Ji ber bilêt biha bûne kes nikare biçe şîn û şahiyên hev jî. Em dixwazin mazot erzan be û em bilêta erzantir bidin gelê xwe. Ji ber bihabûnê kes nayê û naçe. Niha ji 10 servîsan em 6 servîsan dixebitînin. Tevahî fîrmayên li vir bi pirsgirêkan re rû bi rû ne. Zehmiyetên fîrmayan gelek in. Mînak îro bilêta Stenbol 1800 lîre ye. Rêwî li şûna 1800 lîre bidin otobusê, dibêjin ez ê bi balafirê biçim. Bihayê mazotê zêde dibe, em jî neçar dimînin û bilêtan zem bikin.”
‘Roj bi roj kar kêm dibe’
Xebatkarê Otogarê Sedat Çîftçî ji bal kişand ser rewşa bihabûna mazotê û nebûna rêwiyan û diyar kir ku li her erebeyekê 4-5 kes siwar dibin û got: “40 sal in ez vî karê dikim. Rewşa me qet ne baş e. Halê û rewşa me roj bi roj ber bi xerabiyê ve diçe. Rêwî tune ne, mazot biha ye û zivistanê karê me qet baş nîn e. Em dixwazin mazot erzan bibe. Em dixwazin rêwiyên me zêde bin. Em dikevin zirarê gelek servîsên me niha naxebitin.”
‘Em diçin û tên zirarê dikin’
Şofêrê otobusê Bulent Karatepe jî anî ziman ku dema derdikevin rê li 6-7 nokteyan lêgerînê yên polîs û leşkeran têne rawestandin, ev yek rêwîtiya wan bi derengî dixîne û got: “Lê pirsgirêkên me yên mezin bihabûna mazotê ye. Mazot biha ye em diçin û tên zirarê dikin. Bilêt biha dibin lewma rêwiyên me jî kêm dibin. Heke mazot biha nebe dê bilêt li fiyetek standart bimînin.”
