Amed – Weşanxaneya Aramê bi daxuyaniyekê helbestvan Ehmed Huseynî bi bîr anî. Weşanên Aramê diyar kir ku ew bi wefata Ehmed Huseyîn xemgîn bûne û got: “Nivîskarê me yê dilsoj di helbestên xwe de evîn û têkoşîna gelê xwe li ser rûpelan neqişand. Em nikarin bêjin oxir be mamosteyê me. Tu dê her kêlî bi me û bi gelê xwe re bî.”
Helbestvanê navdar ê Kurd Ehmed Huseynî ku demeke dirêj bû ji ber nexweşiya penceşêrê li Swêdê dihat dermankirin, duh jiyana xwe ji dest da. Gelek sazî, dezgeh û kesayetan ji bo wefata Ehmed Huseynî peyam weşandin. Weşanxaneya Aramê jî bi boneya wefata nivîskar Ehmed Huseynî daxuyaniyeke niviskî weşand.
‘Ji ber zext û êrişan ji welatê xwe derket û çû Ewropayê’
Weşanxaneya Aramê di daxuyaniya xwe de got ku “Bi xemgîniyeke mezin me bihîst ku helbestvanê me yê navdar, Mîrê Helbestê Ehmed Huseynî jiyana xwe ji dest daye” û wiha qala jiyana wî kir: “Ehmed Huseynî li Rojava li Bajarê Amûdê di sala 1955an de ji dayîk dibe. Li şamê beşa felsefeyê kuta kir. 1989an de ji ber zext û êrişên desthilata dagirker Baasa Sûriyeyê ji welatê xwe derket û çû Ewrûpayê.”
‘Têkoşereke leheng yê çand û hunera welatê xwe bû’
Weşanxaneya Aramê destnîşan kir ku Ehmed Huseynî di nava kurdan de yek ji pêşengê helbesta nûjen û têkoşereke leheng yê çand û hunera welatê xwe bû û wiha got: “Nivîskarê me yê qedirbilind di 2011an de hemû helbestên xwe anî û radestî weşanxaneya gelê Kurd Aramê kir. Weşanxaneya Gel Aramê berhemên nivîskarê gelê Kurd rêzdar Ehmed Huseynî weke 2 cîld bi navê Berhemên Giştî çapkirin. Ew helbestvanê dilsoj ê gel û axa welatê xwe bû. Nivîskarê me yê dilsoj di helbestên xwe de evîn û têkoşîna gelê xwe li ser rûpelan neqişand. Em nikarin bêjin oxir be mamosteyê me. Tu dê her kêlî bi me û bi gelê xwe re bî.”
