Wan – Welatiyên Wanî têkildarî pêvajoya Aştî û Civaka Demokratîk axivîn û gavneavitina dewletê rexne kirin û gotin: “Dibêjin dibêjin lê napêjin.”
Rêberê Gelê Kurd Abdullah Ocalan di 27ê Sibata 2025an de banga Aştî û Civaka Demokratîk kir. Vê bangê li Tirkiye, Kurdistan û çar aliyê cîhanê deng veda û bi baldarî hat şopandin. PKKê piştî banga Aştî û Civaka Demokratîk di 1ê Adarê de agirbestê ragihand. PKKê piştre di 5-7ê Gulanê de kongreya xwe ya 12emîn li dar xist û biryara xwefesixkirinê da. Di 11ê Tîrmehê de jî li Şikefta Casenê ya li Silêmaniyê jî merasîma şewitandina çekan li dar xist komeke gerîlayan bi navê Koma Aştî û Civaka Demokratîk çekên xwe şewitandin. Tevgera Azadiyê di 26ê Cotmehê de li Qendîlê di çarçoveya pêvajoya Aştî û Civaka Demokratîk de daxuyanî da û ragihand ku gerîlayên xwe ji Bakurê Kurdistanê û Tirkiyeyê paşve vekişandiye.
Di 9ê Tîrmehê de, peyameke vîdyoyî ya Rêberê Gelê Kurd Abdullah Ocalan û girtiyên li Îmraliyê hate weşandin. Abdullah Ocalan di vê peyama xwe de got: “Qonaxa heyî pêwîst dike ku gavên nû werin avêtin. Ez baweriya xwe bi hêza siyaset û aştiya civakî tînim, ne bi hêza çekan.”
Di çerçoveya pêvajoya “Aştî û Civaka Demokratîk” de li meclisa Tirkiyeyê komîsyonek hat avakirin. Komîsyona Meclisê bi gelek aliyên civakê re hevdîtin kir û rapora ku di encama van civînan de amade kiribû eşkere kir. Komîsyonê herî dawî di 18ê Sibatê de civîna xwe ya dawî li dar xist û rapora ku amade kiribû pêşkêşî dengdayînê kir û rapor hat erêkirin. Welatiyên Wanê bi boneya salvegera yekemîn a pêvajoya Aştî û Civaka Demokratîk ji Ajansa Welat re axivîn.
‘Em tu wextî heqaretê qebûl nakin’
Welatiyên Wanî gavneavitina dewletê bi gotineke Kurdan a pêşiyan rexne kirin û gotin: “Dibêjin dibêjin lê napêjin.” Welatiyan anî ziman ku bi sed salan in gelê Kurd rastî zilmê, heqaret û kuştinê tê û ev yek anîn ziman: “Gelê Kurd qewmekî boş e (pirr e), em vê zilmê heq nakin, miletên din çawa însan in em jî wisa însan in. Em başî û xweşiyê dixwazin. Ne ji bo xwe tenê jî, ji bo hemû însanan. Em tu wextî heqaretê qebûl nakin.”
‘Naveroka rapora komîsyonê ne zelal e’
Welatiyan da zanîn ku ev salek e Rêberê Gelê Kurd û PKKê gelek gav avêtin lê dewletê hê tu gav neavêtiye û gotin: “Rêber Apo gavên girîng avêtin, lê hê di zindanê de ye, bendewariya me ew e ku hemû girtî bên berdan.” Welatiyan da zanîn ku dewlet her behsa çareseriyê dike lê di pratîkê de tu gavan navêje û ev tişt gotin: “Mafê zimanê dayikê hê jî qebûl nekiriye. Naveroka rapora komîsyonê ne zelal e. Baweriya me bi dewletê tune ye.”
‘Divê em bi zimanên xwe perwerdeyê bibînin’
Welatiyan bal kişand ser gotinên wek ‘Kurdî qedexe nîn e, Kurd li her derê dikarin bi zimanê xwe biaxivin’ û wiha gotin: “Çi maf ji bo zimanê Tirkî hene gere ji bo zimanê Kurdî jî hebin. Zaten ez li mala xwe bi zimnê xwe diaxivim. Lê ev têrê nake. Gere ji bo zimanê me dibistan hebin, em bi zimanê xwe perwerdeyê bibînin. Heke me bi zimanê xwe perwerde bidîta îro Kurdiya me dê baştir bûya û em ê serketîtir bûna”
