Ûkrayna li herêma Tataristanê ya Rûsyayê bi dronan êrîş kir. Di van êrîşan de 12 kes mirin û 39 kes jî birîndar bûn.
Şerê di navbera Rûsya û Ûkraynayê de bi dijwarî didome. Ûkrayna li herêma Tataristanê ya Rûsyayê bi dronan êrîş kir. Hat gotin ku êrîş li bajarê Nijnekamskê hatiye kirin ku .ev bajar ji sînorê Ûkraynayê nêzîkî 1600 kîlometre dûr e û bajarekî girîng ê pîşesaziyê ye.
Berpirsiyarên herêmê gotin ku êrîş hem li ser navendên pîşesaziyê hem jî li deverên sivîlan hatiye kirin ku di encamê de 12 kes mirin û 39 kes jî birîndar bûn. Her wiha hat ragihandin ku êrîşên bi dronan di saetên sibehê de jî berdewam kirine.
Wezareta Parastinê ya Rûsyayê, ragihand ku di şevekê de 456 dronên Ûkraynayê li nêzîkî 15 herêmên Rûsyayê û li ser Krîmayê hatine bêbandorkirin.
Li herêma Belgorodê ya li nêzîkî sînorê Ûkraynayê jî êrîşek pêk hat. Hat ragihandin ku dronek li ser xaniyekê ket û di encamê de jinek jiyana xwe ji dest da.
Van êrîşan di demekê de ku ji destpêka şerê mezin ê Rûsyayê li dijî Ûkraynayê zêdetirî çar sal derbas bûne, pêk tên. Di van demên dawî de, êrîşên her du aliyan gihîştine deverên ku ji qada şer dûrtir in.
Di danûstandinên aştiyê de hêj pêşketineke girîng nehatiye bidestxistin. Rûsya û Ûkrayna hîn jî li dijî hev bi dron û fuzeyan êrîş dikin. Ji ber van êrîşan, hejmareke zêdetir a sivîlan jiyana xwe ji dest didin.
