Hevseroka Giştî ya DBPê Çîgdem Kiliçgun Uçar li Çewligê got: “Nabe ku azadiya birêz Ocalan û çareseriya pirsgirêka Kurd were li paşxistin. Wêrektî dê bi her kesî bide qezenckirin.”
Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) ji bo peyamên Rêberê PKKê Abdullah Ocalan bi gel re nîqaş û civînan berdewam dike. Di çarçoveya pêngava “Civînên Aştiya Civakî û Azadiyê” de ku hatibû destpêkirin, îro li Çewligê li eywaneke dawetê civîna gel hat lidarxistin. Nûnerên rêxistinên demokratîk ên sivîl û gelek welatî tev li civînê bûn.
Hevseroka Giştî ya DBPê Çîgdem Kiliçgun Uçar di civînê de axivî. Çîgdem Kiliçgun Uçar bal kişand ser nîqaşên têkildarî çareseriya pirsgirêka Kurd û wiha got: “Partiyên siyasî û lîderên ku pirsgirêka Kurd weke pirsgirêka sereke nabînin û weke pirsgirêkeke divê were çareserkirin nabînin, gavan naavêjin li holê ne. Em weke kesên naxwazin ev pêvajo jî weke yên din vala were derxistin li cem hev in.”
‘Ocalan dev ji berxwedanê berneda’
Çîgdem Kiliçgun Uçar axaftina xwe wiha domand: “Çareseriya demokratîk a pirsgirêka Kurd tê wê wateyê ku tiştên ji ber polîtîkayên ewlehiyê ji berîka me derdikevin dîsa di berîka me de bimînin. Birêz Ocalan 26 sal in di şert û mercên tecrîdê de ye tevî vê jî hêviya xwe ya ji bo çareseriyê winda nekiriye û têdikoşe. Dema ev hêvî mezin dikir, berê wî li gel bû. Dema têdikoşiya, berê wî li girtîhan bû. Ev hêvî tu caran winda nebû. Qadeke siyaseta demokratîk a ku vê hêviyê li ser pêyan bigire û rastiyeke gel heye.”
‘Nabe ku azadiya Ocalan were paşxistin’
Çîgdem Kiliçgun Uçar bal kişand ser rêxistinkirina civakê û wiha got: “Divê rêxistinên civaka sivîl jî têkildarî aştiyê biaxivin. Di sedsalên serpêhatiya netewe dewletê de axaftina li ser pirsgirêka kurd hate qedexekirin. Divê ev rewş were guherandin. Mîna şikandina polîtîkayên tecrîd, rejîma qeyûm û polîtîkayên şerê taybet.”
Çîgdem Kiliçgun Uçar bal kişand ser jiyana li Bakur û Rojhilatê Sûriyeyê û wiha axivî: “Her kes ji wê jiyanê dihesûde lê welatê me ji xwe re weke gefekê dibîne. Gef nîne. Berevajî vê, em qala modêleke demokratîk dikin. Gel dikarin wekhev û azad bijîn. Di vê modêlê de pirsgirêka nîne ka kî çi baweriyê dijî. Lewma çareseriya demokratîk a pirsgirêka Kurd, biqasî parastina statuya Rojava girîng e. Ya ku vê birêve dibe jî îradeya gelê Kurd a bi fikriyata birêz Abdullah Ocalan e. Nabe ku azadiya birêz Ocalan û çareseriya pirsgirêka Kurd were paşxistin. Divê mirov bi cisaret be û vê meseleyê ji hemû aliyan ve biaxive. Amadekarina qanûn û sererastkirinan a di nava aştiyê de dê bi her kesî bide qezenckirin.”
Piştî axaftinan, civîn ji çapemeniyê re girtî berdewam kir.
