Hevseroka Giştî ya DEM Partiyê Tulay Hatîmogûllari li navçeya Serêkaniyê bi jinên ereb re hat cem hev û li pirsgirêkên wan guhdarî kir.
Bi beşdariya Hevseroka Giştî ya DEM Partiyê Tulay Hatîmogûllari û Meclîsa Jinan a DEM Partiyê, li gundê Zoncikê yê navçeya Serêkaniyê ya Rihayê bi jinên ereb re civînek hat lidarxistin.
‘Jin hemû barê jiyanê hildigirin’
Tulay Hatîmogûllari di civînê de û bal kişand ser rola jinê ya di nava jiyanê û wekheviyê de û wiha got:”Wekî jineke ereb, ez pir kêfxweş im ku tevlî hevdîtineke bi vî rengî dibim. Wekî DEM Partî, em di nav partiyên din ên li Tirkiyeyê de nûnertiya jinê diparêzin. Sîstema hevserokatiyê û nûnertiya wekhev li cîhanê pir kêm e. Ji vî aliyî ve xebatên jinan ji bo me pir girîng in. Ji ber ku jin di nava jiyanê de tevahiya barî hildigirin ser milên xwe. Jin ne tenê li malê, di nav jiyanê de jî kedeke mezin didin. Lê belê rêz li vê keda ku tê dayîn nayê girtin. Em vê yekê bi aşkereyî dibînin.”
Li ser pirsgirêkên jinan axivîn
Piştî axaftina Tulay Hatîmogûllari, jinan mafê axaftinê girtin û bal kişandin ser polîtîkayên desthilatdariyê yên ku pirsgirêkên jinan paşguh dikin. Di civînê de li ser çareserkirina pirsgirêkên ku jinên ereb pê re rû bi rû dimînin rawestiyan, nêrîn û agahî hatin parvekirin.
Civîn piştî guftûgoyan û bi kişandina wêneya komî bi dawî bû.
