Hevseroka Giştî ya DEM Partiyê Tulay Hatîmogûllari di civîna gel a Bazîdê de axivî û diyar kir ku ji bo çareserkirina meseleya Kurd divê têkoşîneke xurt bê dayîn û got: “Ji bo serkeftina vê pêvajoyê azadiya Abdullah Ocalan girîng e.”
Rêxistina DEM Partiyê ya Agiriyê di çarçoveya pêvajoya “Aştî û Civaka Demokratîk” de li navçeya Bazîdê civîna gel li dar xist. Hevseroka Giştî ya DEM Partiyê Tulay Hatîmogûllari û bi sedan welatî tev li civîna ku li navçeya Bazîdê hat lidarxistin, bûn. Di civînê de dirûşmeyên “Bijî Serok Apo” û “Bi can û xwîn em bi te re ne Serok” hatin berzkirin. Tulay Hatîmogûllari derbarê geşedanên dawî axaftinek kir û bal kişand ser pêvajoya “Aştî û Civaka Demokratîk”.
‘Kurd û dostên wan komplo şermezar kirin’
Tulay Hatîmogûllariyê kesên ku duh li Kurdistan, Tirkiye û gelek welatên cîhanê ji bo şermezarkirina komploya 15ê Sibatê daketin kolanan silav kir û da zanîn ku 27 sal in, Abdullah Ocalan di bin şert û mercên dijwar ên tecrîdê de, bi biryardarî û bawerî, qet dev ji hewldanên xwe yên ji bo têkbirina vê komployê, ji bo aştiyê, ji bo herêmê û ji bo ku gelên Tirkiyeyê di cîhaneke wekhev û aştiyane de bijîn bernedaye û got: “Tevî van şert û mercên dijwar jî ev hewldanên xwe domandiye. Duh, ne tenê li Tirkiyeyê, ne tenê li Stenbol, Edîrne, Amed, Îzmîr, Çukurova û herêmên Serhedê, lê li gelek welatên Rojhilata Navîn, gelek welatên Ewropayê û gelek deverên cîhanê, gelê Kurd û dostên wan li kolan û meydanan bûn da ku Komploya Navneteweyî ya 15ê Sibatê protesto bikin. Ev girse hemû bi daxwaza azadiya Birêz Abdullah Ocalan hatin gel hev.”
‘Azadiya Ocalan ji bo serkeftina pêvajoyê pir girîng e’
Tulay Hatîmogûllari behsa “Banga ji bo Aştî û Civaka Demokratîk” a ku ji hêla Rêberê Gelê Kurd Abdullah Ocalan ve hatiye destpêkirin kir û wiha berdewamî da axaftina xwe: “Birêz Abdullah Ocalan pêvajoyek da destpêkirin. Em hemû dizanin ku ev pêvajo di rastiyê de armanc dike ku Komploya 15ê Sibatê têk bibe. Azadiya Birêz Ocalan ji bo serkeftina vê pêvajoyê pir girîng e û ev yek li gorî ruhê pêvajoyê ye. Em li bendê ne ku di vî warî de gavên girîng werin avêtin. Îro şandeya me ya Îmraliyê li bi Birêz Ocalan re hevdîtinê dike. Em piştrast in ku peyamên pir girîng ên Birêz Ocalan jî di derbarê pêvajoyê de hebin. Dema ku şandeya me vegere, em ê agahiyên wî bi raya giştî re parve bikin. Me wekî şandeyek silavên xwe û yên gelê xwe ji Birêz Ocalan re şandine. Ji Bazîdê, careke din hezar silav ji Îmraliyê re.”
‘Dest ji pênaseya terorê berdin’
Tulay Hatîmogûllari bal kişand ser rapora ku dê ji hêla Komîsyona Parlamentoyê ve di çarçoveya çareseriya demokratîk a pirsgirêka Kurd de were weşandin û wih pê de çû: “Em pir girîngiyê didin vê rapora komîsyonê, nemaze di vê serdemê de. Rapora komîsyonê bêguman dê vê pirsgirêka Kurd a 100 salî di kêliyekê de çareser neke. Em hemî ji vê yekê haydar in. Lê pir girîng û dîrokî ye ku ev rapor bi awayekî saxlem were weşandin da ku gavên berbiçav werin avêtin. Dema ku me li pêşnûmeya rapora komîsyonê ku ji çapemeniyê re derket, nihêrî, me dît ku têgeha terorîzmê pir caran tê bikar anîn. Em hêvî dikin ku di civîna îro de, ew ê dev ji pênasekirina pirsgirêka Kurd di çarçoveya terorîzmê de berdin. Ji ber ku pirsgirêka Kurd ne pirsgirêkek terorîzmê ye.Pirsgirêka Kurd pirsgirêkek sosyolojîk, aborî, civakî û siyasî ye. Divê di vê çarçoveyê de were niqaşkirin û çareserkirin. Em hêvî dikin ku ev rapor qaneke ku hemû endamên PKKê digire nava xwe, bê pêşkêşkirin. Gavên herî girîng ên ku em ji vê komîsyonê hêvî dikin guhertinên qanûna dijterorê, Qanûna Cezayê ya Tirkiyê û Qanûna Înfazê ne.”
‘Divê em yekgirtî bin’
Tulay Hatîmogûllari wiha dawî li axaftina xwe anî: “Ji bo serkeftina pêvajoyê divê em ne tenê bi gotinan, lê bi kiryaran jî rûyê xwe ber bi Îmraliyê ve bizivirînin. Aştî li ser tepsiyeke zîvîn ji me re nayê pêşkêş kirin. Aştî ne tenê bi civînên li Enqerê an jî civînên li Îranê ve sînordar e. Ger em dixwazin bihêz bin, rêya serkeftina diyalogê li ser maseyê, têkoşîneke bihêz li meydanan e. Ger em têkoşîneke bihêz bidin, ger em bi rêxistineke bihêz derkevin holê, bizanin ku em ê destê Birêz Ocalan jî xurt bikin. Em dikarin bi vî rengî destê DEM Partiyê di danûstandinên li ser maseyê de xurt bikin. Zêdetirî 100 sal in mafên gelê Kurd ji destê wan hatiye girtin. Divê sedsala nû ji bo gelê Kurd bibe sala çareseriyê. Divê em yekgirtî bin, divê em bi hev re bin.”Piştî axaftinê, civîn ji çapemeniyê re girtî berdewam kir.
