Serokê DYAyê Donald Trump diyar kir ku di hevdîtinên bi Îranê re têne kirin de pêşketinên girîng çêbûne. Trump got ku; bidawîkirina bernameya nukleerî mercê bingehîn ê lihevkirinê ye; û hişyarî da ku heke ev pêk neyê bijareya leşkerî wê bisepînin.
Serokê DYAyê Donald Trump, li Floridayê daxuyanî da rojnamegeran û ragihand ku di hevdîtinên navbera DYA û Îranê de gavên girîng hatine avêtin. Trump anî ziman ku her du alî jî dixwazin lihev bikin û diyar kir ku dibe ku di demeke nêz de bi telefonê biaxivin.
Trump tekez kir ku rawestandina bernameya nukleerî ya Îranê ji bo peymanê “merca herî sereke” ye û got ku di rewşeke berovajî de bijareya leşkerî dê li ser masê be.
Hate ragihandin ku karbidestên Amerîkî Steve Witkoff û Jared Kushner jî beşdarî hevdîtinan bûne. Trump diyar kir ku ew bi “kesekî astbilind” ê di nava Îranê de re di têkiliyê de ne, lê destnîşan kir ku bi rêberê dînî Xamaneyî re hevdîtin nehatiye kirin.
Li gorî daneyên Ajansa Navneteweyî ya Enerjiya Atomê ya ser bi Neteweyên Yekbûyî, di destê Îranê de stokên uranyuma bi rêjeya %60 hatiye dewlemendkirin hene. DYA daxwaz dike ku ev bername bi tevahî were bidawîkirin.
