Hikûmeta demkî ya Şamê li taxên Şêxmaqsûd, Eşrefiyê û Benî Zêdê ên Helebê li dijî Kurdan êriş dan destpêkirin. Asayîşa taxan li dijî van êrişan parastina gel dikin. Rayedarên Tirk jî bi daxuyaniyên xwe ve piştgirî didin van êrişên li dijî Kurdan û Helebê wek wîlayeteke Tirkiyeyê dibînin.
Berdevkê Koma AKPê Omer Çelîk di daxuyand ku yekpariya axa Sûriyeyê ji bo wan gelek girîng dibîne û derbarê pirrengiya Sûriyeyê wiha got: “Yek dewlet, yek artêş yek Sûriye. Yên li dijî vê rêgezê çekan radikin xizmeta hêzên biyanî dikin.”
‘Berjewendiyên Tirkiyeyê tên esasgirtin’
MÎTa Tirkiyeyê diyar kir ku ew li gorî fermanên Serokkomarê AKPî Recep Tayyîp Erdogan bi baldarî û ji nêz ve hemû geşedanên li Sûriyeyê dişopînin. MÎTê da zanîn ku Tirkiye ewlehiya Sûriyeyê wek ewlehiya xwe dinirxîne, geşedanan di çarçoveye ewlehî û berjewendiyên Tirkiyeyê digirin dest û dişopînin.
‘Em hevkariya şirîkên xwe dikin’
Vezîrê Karên Derve yê Tirkiyeyê Hakan Fîdan duh têkildarî êrişên komên çeteyên girêdayî hikûmeta demkî ya Şamê û Tirkiyeyê daxuyanî da. Hakan Fîdan diyar kir ku ew geşedanên li Sûriyeyê ji nêz ve dişopînin û derbarê êrişên komên çeteyan ev tişt gotin: “Em geşedanan ji nêz ve dişopînin. Em bi şirîkên xwe yên herêmî û navnetweyî re di nava hevkarî û têkiliyê de ne.”
‘Em amade ne ku têkevin dewrê’
Wezareta Ewlehiya Neteweyî ya Tirkiyeyê têkilarî êrişên komên çeteyên hikûmeta demkî ya Şamê peyama piştgiriyê weşand. Wezaret diyar kir ku ew rêgeza ‘yekdewletî û yek artêşê’ diparêzin û têkildarî êrişên li dijî kurdan tên kirin wiha axivî: “Heke daxwaz were kirin amade ne ku têkevin dewrê û alîkariya hikûmeta demkî ya Şamê bikin.”
‘Mutabakat nebe bi darê zorê’
Serokê MHPê Devlet Bahçelî 3 roj beriya niha têkildarî geşedanên li Sûriyeyê daxuyanî da û têkildarî rewşa Kurdên li Sûriyeyê wiha got: “An bi mutabakatê an jî bi zorê divê yekparbûna ax û siyaseta Sûriyeyê were pêkanîn. Taybetî eşîrên Ereb divê bêyî tu şertan li gel rêveberiya Şamê bisekinin.”
