Amed – Meclîsa Jinan a Şaredariya Bismilê û karkerên şaredariyê tiriyê ku ji rezên şaredariyê diçinin dikin dims û belavî malbatên feqîr dikin.
Şaredariya Bismilê li navçeyê zeviyeke 18 donim rez çandiye û tirî jî berhev dike. Di nav rez de 8 cure tirî hene. Hêdî hêdî li bakurê Kurdistanê werza çinîna tirî û çêkirin dims û bastêqan dest pê dike. Meclîsa Jinan a Şaredariya Bismilê û karkerên şaredariyê jî bi hev re li nav rez tirî diçinin. Jin û karker tiriyê ku diçînin hem difiroşin hem jî dikin dims. Pereyê ku ji firotina tirî tê û dimsê jî didin malbatên ku rewşa wan a aboriyê nebaş e. Endama Meclîsa Jinan a Şaredariyê Aynûr Aktar derbarê karê ku dikin de axivî.
‘Em dixwazin jin pêşengtiya vî karî bikin’
Aynûr Aktar da zanîn ku endamên Meclîsa Jinan û karkerên şaredariyê bi awayekî komunal vî karî dikin û wiha got: “Em jin û hevalên mêr vî karî bi awayekî komunal dikin. Em dixwazin jin pêşengtiya vî karî bikin. Piştî vî karî em ê li vir marol, tivir, pîvaz, tûzik, roka biçînin. Em ê vî karî jî bi hev re bi awayekî komunal bikin. Me ji rez dest bi karê xwe kir.”
‘Dixwazin ev xebata komunal belav bibe’
Aynûr Aktar diyar kir ku di saetên serê sibê de dest bi çinîna tirî dikin û pêvajoya çêkirina dimsê vegot û ev yek anîn ziman: “Dimsa ku em çêdikin em didin malbatên feqîr. Hin malbatên ku nikarin dimsê bistînin hene. Em li ser navê şaredariyê li wan belav dikin. Em dixwazin ev xebata komunal belav bibe ku bizanibin xebateke wiha li Bismilê heye.”
‘Kî tê dest vala naçe’
Aynûr Aktar bi lêv kir ku gel bi vî karê wan gelekî kêfxweş e û wiha got: “Milet dibe em jî dixwazin tev li xebata we bibin. Ji ber ku jin di malê de ne karê malê dikin. Dixwazin bi axê re mijûl bibin û di nava baxçeyan de bixebitin.” Aynûr Aktan axaftina xwe wiha bi dawî kir: “Me nêzî tonekê firot bazarê. Pereyê wî jî em ê bidin malbatên mexdûr. Hinekan em pere didin hinekan em dimsê didin. Wekî din ev der rezên şaredariyê ne kî tê dest vala naçe ji xwe re tirî dibin.”
