Rojnameya navdar a Îngilîzî The Guardian, di nûçeyeke xwe ya taybet de ku tê de şeş klûbên serkeftî yên ku di vê sezonê de li lîgên jorîn ên Ewropayê balê dikişînin lêkolîn kir, cihekî berfireh da Amedsporê. The Guardianê wiha got: “Li cîhanê pir kêm tîm hene ku ji bo bigihin lîga herî jor a welatê xwe, qasî Amedsporê rêyek dijwar derbas kirine.”
Rojnameya navdar a Îngilîzî The Guardian, di nûçeyeke xwe ya taybet de ku tê de şeş klûbên serkeftî yên ku di vê sezonê de li lîgên jorîn ên Ewropayê balê dikişînin lêkolîn kir, cihekî berfireh da Amedsporê. Rojnameyê serkeftina Amedsporê ya ji bo Lîga Super a Tirkiyeyê ne tenê wekî serkeftineke sportîf her wiha bi nasnameya dîrokî, civakî û çandî ya kulûbê re nirxand.
Amedspor bûye yek ji navendên girîng ên nasnameya Kurdî
Rojnameya The Guardianê bi gotinên “Li cîhanê pir kêm tîm hene ku ji bo bigihin lîga herî jor a welatê xwe, qasî Amed SK an jî Amedsporê rêyek dijwar derbas kirine” dest bi beşa Amedsporê kir û bal kişand ser wê yekê ku kulûb wê di vê sezonê de yekem car di Lîga Superê de têbikoşe. Rojnameyê nivîsî ku kulûba navenda wê Amed e ji Stenbolê bêtir nêzîkî Iraq û Sûriyeyê ye û di bajêr de ku nifûsa Kurd zêde ye, di salên dawî de bûye yek ji navendên girîng ên nasnameya kurdî.
Xwedîderketina kulûbê ya li nasnameya Kurdî girseyeke nû ya alîgiran çêkir
Rojnameyê di nûçeyê de destnîşan kir ku Amedsporê di dema borî de di navbera lîga sêyem û çaremîn a Tirkiyeyê de geriyaye lê di sala 2014an de piştî ku navê Kurdî yê Diyarbekirê ango “Amed” li navê kulûbê zêde kir, bilindbûneke bilez pêk anî. The Guardianê diyar kir ku xwedîderketina kulûbê ya li nasnameya Kurdî girseyeke nû ya alîgiran çêkir, lê ev yek di heman demê de bû sedema rageşiyên bi alîgirên hevrikan re jî.
Rojnameya Îngilîzî bi bîr xist ku alîgirên Amedsporê di dema borî de rastî heqaret, gef û êrîşên fîzîkî hatine û Federasyona Futbolê ya Tirkiyeyê jî piştî van rageşiyan heta sala 2020an çûyîna alîgirên Amedsporê ya ji bo maçên deplasmanê qedexe kiribû. Li gorî The Guardianê, beşdariya Amedsporê ya di lîga herî jor a Tirkiyeyê de bi xwe re pirse nîşanên nû yên derbarê ewlehî û bûyerên tundiyê yên muhtemel de jî tîne.
Pîrozkirina Erdogan matmayî kir
The Guardianê bi taybetî bal kişand ser pîrozkirina Serokkomar Recep Tayyîp Erdogan a serkeftina dîrokî ya Amedsporê ya ji bo Lîga Super a li ser medyaya civakî. Rojnameyê diyar kir ku her çend Erdogan figurekî siyasî bû ku navê Amedê qebûl nedikir jî pîrozkirina wî ya Amedsporê ya di medyaya civakî de raya giştî matmayî kir.
Tişta ku Amedsporê taybet dike nasnameya wê ya xurt e
Di nirxandina The Guardian de, Amedspor di heman dosyayê de ligel kulûbên din ên ku derketine lîgên mezin ên Ewropayê cih girt. Ligel Deportivo La Coruna, Elversberg a Almanyayê, Le Mans a Fransayê, Wisla Kraków a Polonyayê û FC Vaduz a Liechtensteinê, Amedspor jî wekî yek ji wan tîmên ku divê di sezona nû de bên şopandin hate nîşandan. Li gorî nêrîna giştî ya rojnameyê, tişta ku Amedsporê taybet dike ne tenê derketina wê ya ji bo Lîga Superê ye; çîroka wê ya ji lîgên jêrîn heta lûtkeyê, nasnameya wê ya xurt a alîgiran û helwesta wê ya xweser a di futbola Tirkiyeyê de ye.
