Piştgiriya ji bo Donald Trump di nav gelê Amerîkayê de daketiye ji sedî 32yan. Rêveberiya Trump di qonaxekî dijwar de derbas dibe, ku nerazîbûna ji siyaseta aborî û derve ya rêveberiya wî her ku diçe zêdetir dibe.
Rapirsiya herî dawî ya Kovara The Economist, ku di navbera 25 û 27ê Tîrmehê 2026an de pêk anî, nîşan dide ku piştgiriya gelê Amerîkayê y ji bo Donald Trump daketiye asta herî kêm. Tenê ji sê welatiyan yek performansa Trump di erka serokatiyê de erê dike, piraniya beşdarên rapirsiyê nerazîbûna xwe eşkere kirine. Li gorî rapirsiyê piştgiriya ji bo Trump daketiye ji sedî 32yan.
Lêkolîn diyar dike ku hin komên dengdêran, ku di hilbijartinan de piştgiriya wan ji Trump re rolek girîng lîstibû, niha ji wî dûrketine. Ev guherîn ji aliyê çavdêrên siyasî ve wekî hişyariyek ji bo Partiya Komarî tê nirxandin.
Aborî bûye mijara sereke ya nerazîbûnê
Li gorî anketê, piraniya beşdaran bawer dikin ku biryarên aborî yên rêveberiya Trump, bi taybetî zêdekirina bac û tarîfên li ser kelûpelên ji derveyî welat tên, bûne sedema zêdebûna nirxan û giraniya jiyanê. Gelek ji wan dibêjin ku niha malbat bi mesrefên berê re nikarin heman awayî rabin û şertên jiyanê dijwartir bûne.
Siyaseta derve jî di bin rexneyan de ye
Rapirsî diyar dike ku siyaseta derve ya Trump jî nekariye piştgiriya gelek Amerîkiyan bi dest bixe. Beşekî mezin ji beşdaran dibêjin ku rêveberiya wî di têkiliyên bi welatên din re nekariye aramî û pêbaweriyê biparêze. Li gorî wan, hin biryarên Washingtonê bûne sedema zêdebûna aloziyên navneteweyî.
Nêrîna gel li ser Trump diguhere
Her wiha encamên lêkolînê nîşan didin ku nêrîna gelek Amerîkiyan li ser kesayetiya Trump jî guheriye. Gelek beşdar dibêjin ku ew ji bo birêvebirina welat ne kesekî têra xwe pêbawer e. Hin kesan jî temenê wî wekî faktorek ku dikare bandorê li ser karûbarê serokatiyê bike destnîşan kirine.
Partiya Demokratan li pêş xuya dike
Lêkolîn diyar dike ku ev kêmbûna piştgiriyê tenê bi Trump re sînordar nabe. Di pirsên girêdayî hilbijartinên Kongreyê de jî namzetên Partiya Demokrat li pêş xuya dibin. Çavdêrên siyasî dibêjin ku ger ev meyl bidome, dibe ku di hilbijartina pêş de Partiya Demokratan avantajek girîng bi dest bixe.
