Serokwekîlê Koma DEM Partiyê Sezaî Temellî bi lêv kir ku bendewariya civakê bi çêkirina qanûnan heye û wiha got: “Divê pêşnûmeya demildest were Meclîsê û Meclîs jî qanûnan çêbike. Lê mixabin tevî daxwazên raya giştî jî hê pêşnûmeyek bi vî rengî tune ye.”
Serokwekîlê Koma DEM Partiyê Sezaî Temellî derbarê geşedanên di rojevê de li Meclîsê civîna çapemeniyê li dar xist. Sezaî Temellî diyar kir ku xetereya DAIŞê hê jî berdewam dike û got ku divê di pêvajoya entegrasyonê ya Rojava de ev xetere neyê jibîrkirin.
‘Êdî tehamula civakê nemaye’
Sezaî Temellî bal kişand ser Roja Dayikan û serdana Dayikên Aştiyê ya li partiyên siyasî û wiha got: “Dayikan xwest partiyên siyasî gavan biavêjin. Dayikan bal kişand ser êşa hemû dayikên Kurd û Tirk. Dayikan xwest ji bo aştiyeke mayinde gavên qanûnî bên avêtin. Hemû kes jî li bendê ye qanûn bên çêkirin. Divê pêşnûmeyek demildest were Meclîsê û Meclîs jî qanûnan çêbike. Lê mixabin tevî daxwazên raya giştî jî hê pêşnûmeyek bi vî rengî tune ye. Wezareta Dadê jî dibêje ‘Paketa Darezê ya 12emîn ma meha Cotmehê’. Êdî tehamula civakê nema. Divê qanûn çêbibin û girtiyên siyasî êdî bên berdan. Êdî girtîgeh tije bûne divê ji vê re çareseriyek were dîtin. Lê tevî bendewariya civakê jî di vî warî de tu gav nehatine avêtin.”
‘Bi dozên kumpasê siyasetê dîzayn dikin’
Sezaî Temellî destnîşan kir ku Doza Kobanê 2 sal in li Îstînafê li benda biryarê ye û wiha dirêjî da axaftina xwe: “Dadgeha Îstînafê 2 sal in derbarê dozê de tu biryar nedaye û bêedaletiya heyî çareser nekiriye. Dadgeha Mafên Mirovan a Ewropayê ji bo birêz Selahattîn Demîrtaş biryar da ye jî nayê berdan. Her wiha hevalên me yên din ên vê dozê jî tevî biryarên Dadgeha Mafê Mirovan jî nayên berdan. Divê ev bêedaletiya li dijî hevalên me bi dawî bibe û hevalên me bên berdan. Piştî doza kumpasê ya Kobanê weke dozên Geziyê û Stenbolê jî hatin rojevê. Niha jî qala doza ‘Casusan’ tê kirin. Bi van dozên kumpasê û darazê dixwazin siyasetê dîzayn bikin.”
‘Meclîs berjewendiya sermayedaran diparêze’
Sezaî Temellî bi lêv kir ku Meclîs li dûrî pêdiviyên civakê bi rojevên cuda re eleqedar dibe û wiha axivî: “Divê em li ser pêdiviyên cotkaran qanûnan çêbikin û li ser wê bixebitin lê Meclîs li ser bazirganiya bi Ukraynayê re eleqedar dibe. Li şûna ku em ji bo zêdebûna hilberînên cotkarên xwe eleqedar bibin, em diçin Ukrayna ku di şer de ye ji wê re li ser bazirganiya hilberînên çandiniyê rojeva Meclîsê tijê dikin. Divê hê ku Meclîs neketiye batlanê, li ser xizaniyê raweste û çareseriyan li pêş bixe. Bi pêşniyar qanûna ‘Hebûna Aştiyê’ ku vî hefteyê di Meclîsê de bê gotûbêjkirin jî ji bo berjewendiya sermayedaran e. Yanî bi vê yekê dê bêedaletiya bacan jî zêdetir bibe. Ji bo ev bêedaletî pêk neyê em ê muxalefetê bikin. Lê hêza muxalefetê jî têr nake. Li gorî berjewendiyên sermayedaran qanûnan çêdikin. Meclîs bûye xizmetkarê sermayedaran. Berdela vê jî karker, kedkar û dayik didin. Ji bo wê jî em aştiyê dixwazin. Bi aştiyê ev bêedaletî dikare ji holê bê rakirin û çareserî pêk were.”
Sezaî Temmelî li ser pirsa rojnamegeran jî diyar kir ku tu eleqeya “Pakêta Darazê ya 12emîn” û qanûna taybet tune ye û bendewariya wan a qanûna taybeet berdewam dike ku bê çêkirin lê hê jî ji aliyê desthilatê ve tu gav nehatine avêtin.
Sezaî Temelî li ser pirsa derbarê zarokên karker de jî destnîşan kir ku ji bo pêşî li mirina zarokan û zarokên karker bê girtin divê dawî li projeya MESEMê were anîn û bang li Wezareta Perwerdehiyê kir ku vê pêkanînê bi dawî bike.
