Serokê Nivîsgeha Kar û Barên Penaberan Şêxmûs Ehmed diyar kir ku zêdetirî 100 hezar koçber hatine Herêma Bakur û Rojhilatê Sûriyeyê.
Serokê Nivîsgeha Kar û Barên Penaberan a Rêveberiya Xweseriya Demokratîk a Herêma Şêxmûs Ehmed ji ANHAyê re axivî û diyar kir ku wan di 2 rojên dawî de hejmarek zêde yên ji Heleb û kantona Efrîn-Şehbayê koçber bûne, pêşwazî kirin. Şêxmûs Ehmed da zanîn ku hejmara malbatên koçber ên li navendên bicihanînê yên li Reqa û Tebqayê 20 hezar derbas kiriye. Şêxmûs Ehmed rewşa koçberan bi “trajedîk” bi nav kir û destnîşan kir ku tevî hewldanên Rêveberiya Xweser ên bicihkirina wan lê hîna bi sedan malbat li çolan mane.
Ji bo demekê li dibistanan bi cih kirine
Der barê bicihkirina koçberan de Şêxmûs Ehmed ev agahî dan “Destpêkê me ew li bajarên Reqa û Tebqayê pêşwazî kirin. Me bi awayekî demkî ew li dibistanên li bajar û gundewarên wê bi cih kirin. Ji ber hejmara wan zêde ye me beşek ji wan şandin kantonên Firat û Cizîrê. Maseya Krîzê li kantona Tebqayê 235 cih ku piraniya wan dibistan in û li bajarê Reqayê 60 cih vekirine. Li her navendekê nêzî 40 mal hatine bicihkirin.”
Şêxmûs Ehmed da zanîn ku berdewama şer dibe sedema zêdebûna koçberiyê û got “Divê hemahengî bi Neteweyên Yekbûyî re were kirin da kampên taybet ji wan re çêbikin.”
Şêxmûs Ehmed diyar kir ku tu plana avakirina kampeke taybet ji bo koçberên ji Heleb û kantona Efrîn-Şehbayê tune ye û wiha axivî: “Em ji gelê Bakur û Rojhilatê Sûriyeyê re spas dikin. Pêşwaziya koçberan kiriye.” Serokê Nivîsgeha Kar û Barên Penaberan Şêxmûs Ehmed bang li rêxistinên navneteweyî, Neteweyên Yekbûyî û Konseya Ewlekariyê kir ku deriyê sînor ê Til Koçerê ji bo derbasbûna alîkariyan vekin û li hemberî êrişên dewleta Tirk a dagirker helwesteke cidî nîşan bidin.
Çeteyên Heyet Tehrîr El Şam (HTŞ) û yên hêza xwe ji Tirkiyeyê distînin di 27ê Mijdarê de êrişeke berfireh li dijî Heleb û Idlibê kiribûn. Piştî vekişandina hêzên hikumeta Şamê çeteyên HTŞê piraniya taxên Helebê dorpêç kirin. Meclisa Gel a Kantona Efrîn û Şehbayê jî ji bo pêşîgirtina li komkujiyan biryara valakirina kantona Efrîn-Şehbayê daye. Li ser vê yekê bi hezaran malbat koçî herêmên Bakur û Rojhilatê Sûriyeyê kir. Koçberiya ber bi herêmê ve dewam dike.
