Serlêdanên pêşbirka nivîsandina lîstikên şanoya Kurdî dest pê kir

Serlêdanên ji bo 7emîn Pêşbirka Lîstikên Şanoya Kurdî ya Ebdurrehîm Rehmî Hekarî dest pê kir.

Şanoya Bajar a Şaredariya Bajarê Mezin a Amedê bi boneya ku nivîskariya lîstikên Kurdî bi pêş bixe û berê nivîskarên ciwan bide nivisandina lîstikên şanoyê û her wiha bi mebesta ku lîstikên nû li şanoya Kurdî zêde bike û van xebatan li nav civakê belav bike vê pêşbirkê li dar dixe. Xelatên pêşbirkê dê li ser navê nivîskar Ebdurrehîm Rehmî Hekkarî ku yekem teksta şanoya Kurdî ya bi navê “Memê Alan” nivîsandiye, tên dayîn.

Şertên serlêdanê ev in:

1. Serlêder di hilbijartina mijaran de serbest in. Dibe ku lîstik ji roman, çîrok, helbest, bîrewerî û hwd. bo şanoyê hatibin lêanîn.
2. Nivîsarên lîstikê divê herî kêm bêvalahî 30.000 (sî hezar) karakter bin û bi kompîturê hatibin nivîsandin.
3. Lîstikên ku tev li pêşbaziyê dibin, divê heta dîroka dawî ya serîlêdanê li tu derê nehatibin weşandin û li tu şanoyekê nehatibin lîstin.
4. Her nivîskarek herî zêde dikare bi lîstikekê beşdarî pêşbirkê bibe.
5. Divê beşdar du zerfên cuda ku yek ji bo nivîsara lîstikê, yek ji bo agahiyên serlêder (nav, paşnav, navnîşan, kurtejiyan, jimareya telefonê) bixin nav zerfekê û li ser zerfan tenê nasnav/mexlas hebe; divê bi tu awayî navê rastîn li ser zerfan û li ser nivîsara lîstikê tune be.
6. Nivîsên lîstikê yên ku bi awayê dîjîtal bêne şandin, divê heta 1ê Tebaxa 2025an bi e-posteyê bêne şandin. Herwiha divê nivîskar bi e -posteyekê, bi dosyayek cuda, kurtejiyana xwe ya ku nasnavê wan tê de ye û agahiyên têkiliyê bişînin.

Lîstik divê herî dereng heta êvara 1ê Tebaxa 2025an, li ser kaxiz an jî bi formateke dîjîtal bi destan bên radestkirin an jî bi posteyê bên şandin.

Lijneya jûriyê

Ji bo nirxandina lîstikan lijneyeke ku ji pênc kesan pêk tê hatiye avakirin. Di vê lijneyê de Dr. Ghotbedin Sadeghi, Helket Edrîs, Kawa Şêxê, Rûgêş Kirici û Şîlan Alagoz cih digirin.
Sê lîstikên herî serkeftî dê bên xelatkirin

Lîstikên ku bibin yekemîn, duyemîn û sêyemîn dê bên xelatkirin. Dê ji bo lîstika yekemîn 80 hezar TL, ji bo ya duyemîn 60 hezar û ji bo ya sêyemîn jî 40 hezar TL bê dayin. Her wiha 20 hezar TL dê xelata mansiyonê bê dayin. Lîstikên ku xelat werbigirin wê ji hêla lijneya repertuara Şanoya Bajêr ve bên nirxandin û wê di nav weşanên Şaredariya Bajarê Mezin a Amedê de wekî pirtûk bên çapkirin.