Hevşaredarê Bajarê Mezin ê Amedê yê berê Selçûk Mizrakli ku li şûna wî qeyûm hatibû tayînkirin, li Goristana Yenikoyê serdana gora dayik û bav û gelek kesên di demên cuda de jiyana xwe ji dest dane kir.
Hevşaredarê Berê yê Bajarê Mezin ê Amedê Selçûk Mizrakli, piştî ku duh ji girtîgehê derket, îro li Goristana Yenikoyê ya navçeya Rêzan a Amedê serdana gora gelek kesan kir. Pêşî serdana gora dayika xwe Leman Mizrakli û bavê xwe Mahmud Nedim Mizrakli kir. Her wiha serdana gora malbata Hevşaredarê berê Osman Baydemîr jî kir. Selçûk Mizrakli piştî wê serdana gora Dr. Îlhan Dîken jî kir.
Selçûk Mizrakli ku serdana gora Serokê Baroya Amedê yê berê Tahîr Elçî jî kir û diyar kir ku dema nûçeya mirinê bihistiyê ew di nexweşxaneyê de di ameliyatê de bûye û wiha axivî: “Dema me bihîst ku Tahîr Elçî hatiye kuştin me bawer nekir, me nexwest bawer bikin. Weke ku me jê re bigota dilê aştiyê yê lerzîn, weke kevokekî spî dilerizî. Guleya ku li Tahîr Elçî hat reşandin, guleya ku li aştiyê hat reşandin bû. Ji ber vê yekê her kesî wisa difikirî ku ev nabe, ev ne pêkan e. Em hemû hevrêyên dilê wî bûn. Hinek kes dimirin, hinek kes di vê cîhanê de berhemên mezin dihêlin, dibin rêber û hem di vê cîhanê de hem jî li cîhana din dijîn. Tahir jî mirovekî wiha bû.”
‘Berpirsiyariya bingehîn a siyasetê ew e ku aştiyê biafirîne’
Selçûk Mizrakli bi giştî hemû kesên ku li Goristana Yenîkoyê jiyana xwe ji dest dan bi bîr anî û got: “Berpirsiyariya bingehîn a siyasetê ew e ku aştiyê biafirîne, çareseriyê biafirîne. Heke ciwan di pevçûnan de jiyana xwe ji dest bidin, siyaset di nava qelsiyeke mezin de ye. Siyaset karê muzakereyê ye. Di çareseriyê de hevparî ye. Ji ber vê yekê daxwaza me hemûyan ew e ku careke din cenazeyên ciwanên me neyên van axan. Bila cenaze neçe tu aliyê vê welatê. Em îro serdemekê dijîn ku dê vê yekê xurt bike. Deriyê serdemeke ku wekhevî, demokrasî, azadî û hiqûq lê derbasdar bin tê vekirin. Ji bo xurtkirina destên vê deriyê, piştgiriya wê kirin û hêzdan e. Bila jiyan hê bêtir bextewar be, dilxweş be û mirov tirsê ji paşerojê nexwin. Bila bi tirsê li kolanan negerin, bila tirs ji jiyanê dûr bikeve”.
Her wiha Selçûk Mizrakli serdana gora Mehdi Zana jî kir û diyar kir ku di mijara şaredariya Kurd de ew wî wekî rêber digirin dest û got: “Mehdi Zana navê xwe li ser navê bîranîna dîrokê nivîsandiye. Bila cihê te di nava nûran de be.”
Selçûk Mizrakli pişt re serdana Goristana Şehîdan jî kir û gora Vedat Aydin û ya bavê Selahattîn Demîrtaş, Tahîr Demîrtaş a li Goristana Mardînkapiyê ziyaret kir.
Serdan bi kirina diayan bi dawî bûn.
