Hevserokê berê yê Şaredariya Bajarê Mezin a Amedê Selçûk Mizrakli piştî ji girtîgehê derket axivî û wiha got: “Ez ji Abdullah Ocalan, Selahattîn Demîrtaş û tevahiya girtiyan re jî azaadî dixwazim. Bi hêviya ku em hemû li derve bi awayek azad werin gel hev.”
Hevserokê Şaredariya Bajarê Mezin ê berê Selçûk Mizrakli piştî 7 salan ji girtîgehê hate berdan. Mizrakli, ji Girtîgeha Edîrneyê ya Tîfa Fyê ji cem Hevserokê Giştî yê HDPê yê berê Selahattîn Demîrtaş hate tehliyekirin.
Selçûk Mizrakli, li pêşiya girtîgehê ji aliyê Serokwekîlên Koma DEM Partiyê Gulistan Kiliç Koçyîgît û Sezaî Temellî, Berdevka DEM Partiyê Ayşegul Dogan, parlamenter û rêvebrên DEM Partiyê, rêveberên HDKê, DBPê, Dayikên Aştiyê û girseyek qerebalix ve hate pêşwazîkirin. Piştî pêşwaziyê Selçûk Mizrakli daxuyanî da.
‘Me gelek bêhiqûqî dît’
Selçûk Mizrakli diyar kir ku ew her kesî silav dike û wiha got: “Di dilê me de yek hestiyarî heye, jiyanek biratî û jiyak azad e. Bingeha ku niha me aniye gel hev jiyanek demokratîk e û têkoşîna azadiyê ye. Niha di girtîgehê de bi dehan hevalên me hene. Me ji wan hêz û hêvî girt. Bi hêza wan ez ji girtîgehê bi awayek serbilind derketim. Min ji hevalên me yên 18 salî heta 80 salî vê vînê wergirt. Belê me gelek bêhiqûqî dît. Îro ji bo Tirkiyeyê em hatin astekî din. Pêvajoyek girîng heye, ji der ve provakasyon dibe ku hebin. Ji bo vê divê gavên lezgîn werin avêtin. Tu tiştekî ku winda bikî tu yê li wê bigerî. Beriya niha li kolanan hevalên me dihatin kuştin. Piştî di sala 2015an de bêhiqûqî derket astekî bilind. Piştî sala 2015an me edaletê winda kir. Divê em demokrasiyê bihonînin. Divê lêgerîna me ya edaletê bidome. Em qala aştiyê dikin. Aştî ne ew e ku em bibêjin duh me nîqaş kir û îro em werin gel hev. Hişê çareseriyê heye. Ji bona wê divê pêvajo dilrast be. Pêvajoya ji aliyê birêz Abdullah Ocalan hatiye destêpêkirin, bi xêr û xweşî ye. Ji bona wê divê pêvajo jî bi zelalî bi rê ve biçe. Kesek derkeve rê divê dawiyê jî bibîne. Em jî wekî gelê Tirkiyeyê divê pêşiya xwe bibînin. Hewceyî bi gavên ku baweriya gel pê were heye.”
‘Divê Abdullah Ocalan, Demîrtaş û hemû girtî bên berdan’
Selçûk Mizrakli bi bîr xist ku dema ew ji qawîşê derketiye Selahattîn Demîrtaş wî hembêz kiriye û xatir ji hev xwestine û ev yek anî ziman: “Dema ku Girtîgeha Edirne tê gotin, Demîrtaş tê hişê mirovan. Beriya min divê Demîrtaş bihata berdan û niha li vir bûya. Ez îro li vir im, dixwazin di demekî nêz de jî ji bo Demirtaş werim vir û wî pêşwazî bikim. Ez natirsim ku dîsa bikevim girtîgehê. Ez dixwazim hemû hevalên me werin berdan. Ez û Demîrtaş birayê hev, hevrêyê hev bûn. Me pişta xwe dida hevdu. Ji bo jiyanek û Tirkiyeyek baş û civakek demokratîk em difikiriîn. Demîrtaş jî dibêjê çi dibe bila bibe lê bila aştî pêk were. Ez dixwazim bibêjim; ne tenê Demîrtaş di di serî de divê birêz Abdullah Ocalan, Demîrtaş û hemû girtiyên azadiyê werin berdan û li derve bên cem hev.”
