Hevseroka Giştî ya DBPê Çîgdem Kiliçgun Uçar li Semsûrê bi baro, rêxistinên kedê, pîşeyî û platforma jinan re civiya. Rêxistinên sivîl saziyan piştgiriya xwe ya tam ji bo pêvajoyê diyar kirin û destnîşan kirin ku ew ê xebatên xwe berdewam bikin.
Civînên gel û saziyan ên DBPê ku bi dirûşma “Em gotina aştiyê bi gel re ava dikin” hatine destpêkirin, li Semsûrê didomin. Hevseroka Giştî ya DBPê Çîgdem Kiliçgun Uçar bi platformên ked û demokrasiyê, platformên jinan, odeyên pîşeyî, rêxistinên sivîl re hat civiya.
Hevserok Çîgdem Kiliçgun Uçar di civînê de axivî û bal kişand ser rewşa gerdûnî û polîtîkayên zextê yên dema dawî û wiha got: “Plana hilweşandinê ya 10 salan ku di serdemek nêz de li dijî Kurdan hat meşandin, li Tirkiyeyê sepanên antîdemokratîk û li Kurdistanê jî zext û şîdetê herî kûr kir. Tevî van hemû pêvajoyan jî em li ser piyan man. Niha em ê nîqaş bikin ku em ê çawa aştî û demokrasiyê ava bikin. Pêvajoya aştî û çareseriyê, meseleyeke ewqas dîrokî û giran e ku nayê hiştin tenê li ser rehmê dewlet û îktîdarê.”
‘Em dixwazin navê nûbûyînê em bixwe deynin’
Çîgdem Kiliçgun Uçar bal kişand ser rewşa Rêberê Gelê Kurd Abdullah Ocalan û wiha pê de çû: “Gava mirov qala meseleyeke dîrokî dike, eger serek-muzakerakarê ku hûn di çareseriyê de wekî muhatab dibînin hîn jî di statuya girtî de were girtin, ev yek niyetê nîşan dide. Dabînkirina şert û mercên azad ên xebatê, gava herî girîng a aştiyê ye. Çekberdan û tercîhkirina siyaseta demokratîk ku gava herî mezin a çareseriyê ye, wekî şikandineke dîrokî ye. Çima niha em li ser qanûna derbasbûnê û mafên demokratîk nîqaş nakin? Mafên demokratîk û mîsogeriyên hiqûqî yên ku hêzên demokrasiyê daxwaz dikin, mafê tu kesî jê nastîne. Em di dema herî krîtîk de ne û em dixwazin navê vê nûbûnê em bixwe deynin.”
Rewşa Rojava û Rojhilata Navîn
Çîgdem Kiliçgun Uçar destnîşan kir ku Kurdan bi hêza li Rojava bi dest xistine di nava Rojhilata Navîn de hebûna xwe mîsoger kirine û got: “Li Sûriyeya ku berê em bê nasname bûn, îro derfetên hevparîkirina mekanîzmayên rêveberiya dewletê hatine afirandin. Zexteke pir cidî ya civakî û rastiyeke Rojhilata Navîn heye ku daxwaza guhertina şêwaza têkiliya dewletê ya bi Kurdan re dike. Çavê her kesî li ser vê derê ye û em dixwazin piştî gava 27’ê Sibatê, asteke nû ya têkiliyan ava bikin.”
Ji baro, odeyên pîşeyî û platforman piştgiriya tam
Piştî axaftina Çîgdem Kiliçgun Uçar, nûnerên sazî û rêxistinan nêrînên xwe anîn ziman û pirsên xwe kirin. Serokê Baroya Semsûrê Sinan Dogan diyar kir ku dema pêvajo dest pê kir, wekî baro ketine nav fikaran ku dikarin çi bikin û got: “Ev pêvajo wekî mînakên li cîhanê bi rê ve neçû; berovajî wê pêşî çek hatin berdan û rêxistinê xwe fesih kir, piştre pêvajoya muzakerê dest pê kir. Lê hîn jî zemîneke tam li ser xeteke qanûnî nehatiye rûniştandin. Em wekî baro amade ne ku çi bikeve ser milê me bikin.”
Serokê Odeya Bazirganî û Pîşesaziyê ya Semsûrê Mehmet Torunoglu jî destnîşan kir ku di civakeke ku aştî lê hebe de îstihdam pêş dikeve û ev tişt anî ziman: “Em piştgiriya vê pêvajoyê dikin û hêvî dikin ku ev pêvajoyê bi serbikeve”
Nûnerê Platforma Jinan a Semsûrê jî diyar kir ku ji bo ku Tirkiyeyê bi hev re rakin ser piyan, bi hemû hêza xwe hewl didin werin cem hev û destnîşan kir ku piştgiriya wan ji bo vê pêvajoyê tam e.”
Bername piştî bersivandina pirsan bi dawî bû.
