Wan – Şanoger û lîstikvanê Kurd Emîn Kerîmî ku beriya 25 rojan ji aliyê rejîma Îranê ve hatibû binçavkirin hêj jî di bin çavan de ye.
Şanoger û lîstikvanê Kurd Emîn Kerîmî ku li rojhilatê Kurdistanê xebatên çandî dimeşîne, beriya 25 rojan ji aliyê rejîma Îranê ve hatibû binçavkirin. Emîn Kerîmî ku li ser medyayê weke “Emîno” tê naskirin, li bajarê Ûrmiyeyê dijî û li ser platformên medyaya dîjîtal skecên Kurdî belav dike. Emîn Kerîmî yê ku di 1ê tîrmehê de hatiye binçavkirin, ev 25 roj in di bin çavande ye. Li gorî Saziya Mafên Mirovan a Hengawê malbata Emîn Kerîmî ji roja ku ew hatiye binçavkirin ve tu agahî jê negirtine û Emîn Kerîmî li Girtîgeha Îdareya Îtlaatê ya li Ûrmiyeyê di bin çavan de ye. Saziyê da zanîn ku rûpelên Emîn Kerîmî yên torên civakî jî ji aliyê hêzên ewlehî yên Komara Îslamî ya Îranê ve têne birêvebirin.
Di dema tevgera “Jin jiyan azadî” de jî hatibû girtin
Saziya Mafên Mirovan a Hengawê têkildarî binçavkirina Emîn Kerîmî de ev agahî parvekirin: “Hêjayî gotinê ye ku, heta niha ev welatiyê Kurd ji mafê pêwendîgirtin û hevdîtinê ya bi malbat û xizmên xwe re û her wiha ji mafê hevdîtina bi parêzer re bêpar hatiye hiştin. Ev welatiyê Kurd roja Sêşemê 1ê Tîrmeha 2025an, dema ku ji Tirkiyeyê vedigeriya, li sînorê ‘Sêro’ yê ji aliyê hêzên ewlehî yên Komara Îslamî ya Îranê ve hatibû girtin. Hêjayî gotinê ye ku, Emîn Kerîmî di dema tevgera Jin, Jiyan, Azadî de ji aliyê saziyên ewlehî yên Komara Îslamî ya Îranê ve jî hatibû girtin. Heta dema belavbûna vê nûçeyê, zanyariyek serast ji sedemên girtin, tohmetên li dijî wî hatine sepandin, cihê ragirtin û çarenivîsa vî welatiyê Kurd li ber dest nîne.”
Hezkiriyên wî bertek nîşanî girtina wî dan
Gelek hezkiriyên Emîn Kerîmî li ser platformên dîjîtal, bertek nîşanî girtina wî dan û xwestin demildest ew bê berdan. Emîn Kerîmî di sala 2024an de li ser platformên dîjîtal dest bi belavkirina skeca xwe ya çîroka evîndariyê ya “Emîne û Tajdîn” vedibêje kiriye û di demeke kin de ji aliyê Kurdan ve gelek hate hezkirin û temaşekirin. Emîn Kerîmî salên dirêj e li Rojhilat karê şanogeriyê dike û di nava xebatên çand û hunerê de cih digire.
