Amed – Şanoger Mehmet Emîn Yalçinkaya yê di sala 2018an de jiyana xwe ji dest dabû, li ser gora xwe ya li Goristana Yenîkoyê hat bibîranin. Hevalên Mehmet Emîn Yalçinkaya destnîşan kirin ku ew ê di jiyan û xebatên xwe de mîrateya Yalçinkaya bidin jiyandin.
Şanoger Mehmet Emîn Yalçinkaya di 11ê Tebaxa 2018an de ji ber nexweşiya penceşêrê jiyana xwe ji dast bû, li ser gora xwe ya li Goristana Yenîkoyê ya navçeya Rezanê ya Amedê hate bibîranîn. Malbata Mehmet Emîn Yalçinkaya, endamên Şanoya Bajêr a Amedê, Miduriyeta Çand Huner û Karên Civakî ya Şaredariya Bajarê Mezin a Amedê û heval û hogirên wî tev li bîranînê bûn.
‘Em ê mîrateya Mehmet Emîn Yalçınkaya bidin jiyandin’
Di bîranînê de li ser navê Şanoya Bajêr a Amedê Şanoger Omer Şahîn axivî. Omer Şahîn diyar kir ku ew her tim di jiyan û xebatên xwe de Yalçinkaya bi bîr tînin û ev tişt gotin: “Jiyana wî her tim di nav zehmetiyan de derbas bû. Mîna her şanogerekî Kurd, wî jî ji bo şanoya Kurd gelek fedakarî kirin û ji ber vê sedemê wekî her şanogerek Kurd rastî gelek zehmetiyan hat. Mehmet Emîn Yalçinkaya ji me re mîrateyeke mezin hişt. Mîna hemû şanogerên Kurd ên welatparêz xeyaleke wî jî hebû ku di welatekî azad û demokratîk de huner û şanoya Kurdî azad bide jiyandin. Em jî weke hevalên wî yên şanoger û lîstikvan, di jiyan û xebatên xwe de mîrateya Mehmet Emîn Yalçınkaya bidin jiyandin.”
Dû re beşdarên tevlî bîranînê bûne kulîlk danîn ser gora Mehmet Emîn Yalçinkaya.
Derbarê Mehmet Emîn Yalçinkaya de
Şanoger Mehmet Emîn Yalçinkaya di sala 1990an de li Şanoya Bajêr a Amedê weke profesyonel dest bi karê şanoyê kir. Mehmet Emîn Yalçinkaya di bin banê Şanoya Bajêr a Amedê de karê derhênerî, nivîskarî, wergervanî, mamostetî û her wiha lîstikvaniyê jî kir. Di sala 2018an de ji ber nexweşiya penceşêrê li nexweşxaneyeke Îzmîrê jiyana xwe ji dest da.
