Rojnamegerên li Wanê dixebitin têkildarî zext û muameleya xerab ya polîsan serî li Baroya Wanê dan. Baroyê diyar kir ku ew ê serî li hemû rêyan bidin û mafên rojnamegeran biparêzin.
Rojnameger û kedkarên çapemeniyê yên li Wanê ku di van demên dawî de bi êriş, tundî, binçavkirin û heqaretên polîsan re rû bi rû dimînin, têkildarî binpêkirina mafên xwe serî li Baroya Wanê dan. Rojnamegeran bi pêşengiya Komeleya Rojnamegeran a Dîcle Firatê (DFG), Komeleya Rojnamevanên Jin a Mezopotamyayê (MKG) bi Serokê Baroyê Wanê Sînan Ozaraz û rêveberiya baroyê re hevdîtinê pêk anîn. Rojnamegeran behsa zextên li ser çapemeniyê kirin. Baroyê ji bo şopandina zextên li ser çapemeniyê û komkirina delîlan soz da rojnamegeran û diyar kir ku ew ê der heqê polîsên ku van kiryaran dikin, gilî bikin. Her wiha baroyê da zanîn ku ew ê serî li hemû rêyên hiqûqî bidin û rapora ku dê amade bikin, ji saziyên navneteweyî re jî rê bikin.
‘Em ê li dijî neheqiyê serî li hemû rêyên hiqûqî bidin’
Di serdanê de Nûnerê DFGê yê Wanê Adnan Bîlen axivî û diyar kir ku ew ê têkildarî zextên polîsan ên li ser çapemenî û rojnamegeran li vir kom bûn e. Adnan Bîlen got ku di van demên dawî de û di hemû çalakî û xwepêşandanên civakî de polîs rojnamegeran dikin armanc û tundî, gef, heqaret, çêr û muameleya xerab dikin. Adnan Bîlen destnîşan kir ku ew ê li ser vê meselê bisekinin û serî li hemû rêyên hiqûqî bidin.
Ozaraz: Çi bikeve ser milê me em ê bikin
Serokê Baroya Wanê Sînan Ozaraz jî diyar kir ku ew ê ji bo komkirina delîlan komîsyonekê ava bikin û raporekê biweşînin. Sînan Ozaraz anî ziman ku piştî komkirina delîlan ew ê serî li Walitiya Wanê, Miduriyeta Polîsan a Wanê, Wezareta Karên Navxwe û saziyên navneteweyî bidin. Sînan Ozaraz jî ji bo şopandina zextên polîsan ên li ser rojnamegeran soz da û got ku ji aliyê hiqûqî ve çi bikeve ser milê wan dê bikin.
