Rêveberiya Xweser a Bakur û Rojhilatê Sûriyê nerazîbûn nîşanî komkujiya li gundê Berxbotan ê Kobanê da û xwest li dijî êrişên Tirkiyê lêpirsîneke navneteweyî were destpêkirin
Rêveberiya Xweseriya Demokratîk a Bakur û Rojhilatê Sûriyê têkildarî komkujiya li gundê Berxbotan ê Kobanê daxuyaniyek nivîskî weşand. Di daxuyaniya şermezarkirina komkujiyê de hate gotin ku Tirkiyê sûcên şer li dijî gelê Bakur û Rojhilatê Sûriyê pêk anî.
Di daxuyaniyê hat diyarkirin ku bi van êrişan re hemû peymanên navneteweyî hatine binpêkirin û wiha hat gotin: “Komkujiya Berxbotan ne komkujiya destpêkê ye ku ji aliyê Tirkiyeyê ve li dijî Bakur û Rojhilatê Sûriyeyê tê kirin. Êriş li ber çavên civaka navneteweyî û saziyên pêwendîdar pêk hatin. Ev bêdengî bû sedem ku Tirkiye hîn bêhtir sûcên şer bike. Divê têkildarî komkujiyê lêpirsîneke navneteweyî were destpêkirin û encam bi rengê dosyeyekê radestî Dadgeha Ceza ya Navneteweyî were kirin. Êriş dê li pêşiya avakirina Sûriyeke demokratîk, azad û nenavendî nebe asteng.”
