REPAK bang li rejima Îranê kir ku dev jî pergala xwe ya li dijî mafê mirovan, êrîş û kiryarên xwe yê sistematîk a li ser jinan berde û xwest ku cezayên darvekirinê bide seknandin.
Navenda Têkîliyên Derve yên Jinên Kurd (REPAK) têkildarî cezayên darvekirinê yên rejîma Îranê li girtiyên jin û siyasî dibire daxuyanî da. Daxuyaniya REPAKê wiha ye:
“Dema ku em li dîroka rejimên ku tenê bi şer û çewisandinê xwe parastine û hebûna xwe domandine dinêrin em dibînin ku ti car di nav welatê xwe da aramî û aştiyê neafirandine û herku çûye alozî kur bûye. Rejîma Îranê ya Molla ruxmê ku gelê wî di demên herî aloz de jî nebûn alî û li welatê xwe man, ti car deng û daxwazên gelê xwe guhdar nake. Berjewendiyên gelê naparêze û berovajî wê herku diçe tundtir dibe û dikeve rewşekî bêveger.
Di dîrokê de gelek mînak hene, rejîm ango desthilatên ku heger tenê bi yekdestî ya xwe esas bigirin û berjewendiyên gel û hemwelatiyên xwe esas negirin hebûna xwe ne domandine lê dema ku ruxmê hemû ne heqî û bê edeletî li kêleka gelê xwe bûne û hewldane çareser bikin her serkeftî mane.
‘Rejîma Îranê mafê jiyanê yê jinan hedef digire’
Cezayê darvekirinê yê li Şerîfe Mihemedî hatiye birîn ku li dijî binpêkirina mafên mirovan, tundûtûjî, îstîsmar û neheqiyê şer kiriye, ne berhema pergaleke hiqûqî ya li ser bingeha mafan e, lê belê pergaleke ku serdestiya mêran pêş dixe û mafê jiyanê yê jinan hedef digire.
Cezayê darvekirinê li Şerîfe Mihemedî birî
Şerîfe Mihemedî ya ku li bajarê Reşt dijî, di kanûna 2023yan de bi tohmeta “propagandaya li dijî dewletê” hat girtin û di 4ê tîrmeha 2024an de ji aliyê Dadgeha Şoreşê ya Îranê ve cezayê darvekirinê lê hat birîn. Lê belê, piştî îtîrazê, di 12ê cotmeha sala borî de cezayê darvekirinê yê ku ji Şerîfe Mihemedî re hatibû dayîn hat betalkirin. Di 13ê sibatê de, Odeya 2mîn a Dadgeha Şoreşê ya Îranê careke din cezayê darvekirinê li Şerîfe Mihemedî birî.
‘Bêdengî neheqî û bêedaletiyê bi xwe re tîne’
Bi sedan jinên ku ji bo rizgariya xwe şer dikin, berê jî ji aliyê vê rejîma dijminê jinan ve hatine hedefgirtin. Gelên ku vê neheqiyê dibînin li hember van sîsteman bêdeng nemane û wê bêdeng nemînin jî, ji ber her bêdengî bi xwe re neheqî û bêedeletiyên nû ava dike û bi veşartina wê li pişt qanûnê xwe zêde dikin.
Rejîma Îranê ya Molla bi kiryarên xwe vê yekê gelek caran piştrast kir ku ne tenê dijminê jinê û herkesê ku doza mafê mirovan dike û dengê xwe bilind dike. Bi sedan mirov ji ber sedemên cûda li girtîgehane û gelek ji wan jî aqubeta wan ne diyare. Maf xwestin wek sûc tê dîtin û tenê mirin rewa tê dîtin. Li cîhekî ku hewqas zilm û zorî hebe ma mumkune bêdengî an rawestan hebe. Li şûna ku çareserî pêşbixe her hewldanek wek tehdît ji bo pergala xwe a mêr dibîne û serî li zorê dide. Ev hemû li ber çavê cîhanê çêdibin û her ku diçe zêdetir dibe.
‘Dev ji êrîş û kiryarên li ser jinan berdin’
Em wek REPAK bang li rejima Îranê dikin ku dev jî pergala xwe ya li dijî mafê mirovan, êrîş û kiryarên xwe yê sistematîk a li ser jinan berde û cezayên darvekirinê bide seknandin. Yekane riya çareserî û aramî hişmendiya demokratîk, parastina maf û dengê gel e. Her wiha em bang li raya giştî a demokratîk dikin, da ku bibin dengê gelên azadîxwaz û li her derê bertekên xwe li dijî darvekirinê bidin xuyakirin.”
