Stenbol – Hevseroka DEM Partiyê ya Stenbolê Arîfe Çinar têkildarî qanûna çarçoveyî diyar kir ku dewlet bi sedsalan e xwe neguherand, ji bo hebûna xwe biparêze bi salan e polîtîkayên yekperestî meşand û wiha got: “Qanûna çarçoveyî dê bibe destpêka veguherîna demokratîk û deriyê pêvajoyekî nû veke.”
Ev nêzî du sal in li Tirkiyeyê Pêvajoya ‘Aştî û Civaka Demokratîk’ a ku ji hêla Rêberê Gelê Kurd Abdullah Ocalan ve di 27ê Sibata 2025an de hatibû destpêkirin, berdewam dike. Di pêvajoyê de gavên dîrokî tên avêtin. Herî dawî girêdayî pêvajoyê di 5ê Tebaxê de ‘Qanûna Çarçoveyê’ ya bi 12 xalan pêk tê, ji meclisê re hat şandin û 8ê mehê di Komîsyona Edaletê ya Meclisê de derbas bûbû.
Derbarê qanûna çarçoveyî de Hevseroka DEM Partiyê ya Stenbolê Arîfe Çinar ji ajansa me re axivî.
‘Qanûna çarçoveyî dê bibe destpêka veguherîna demokratîk’
Arîfe Çinar anî ziman ku pirsgirêka Kurd cara yekem e tê zemîna hiqûqê û wiha axivî: “Li Tirkiyeyê bi salan e polîtîkayên yekperestî hene, bi vê pêvajoyê re ev yekperestî tê niqaşkirin û di nava civakê de dê guhertin dest pê bike. Qanûna çarçoveyî dê bibe destpêka veguherîna demokratîk û deriyê pêvajoyekî nû veke. Lê divê ev destpêk berdewam bike.”
‘Di qanûnan de kêmasî hene’
Arîfe Çinar destnîşan kir ku ev cara yekem e ku pirsgirêka Kurd ji zemîna negatif derbasî zemîna pozîtîf dibe û wiha berdewam kir: “Lê di qanûna çarçoveyî de kêmasî hene, ev kêmasî ji holê bê rakirin civak jî dê xwedî pêvajoyê derkeve. Zimanê qanûnê hê jî ser teror û sûcdariyê hatiye sazkirin. Statûya birêz Abdullah Ocalan nehatiye tarîfkirin, statûya sermuzekarevan hê jî nehatiye diyarkirin. Dewlet bi sedsalan e xwe neguherand, ji bo hebûna xwe biparêze bi salan polîtîkayên yekperestiyê meşand. Çareseriya bingehîn a pirsgirêkê; hemwelatîbûyîn û di baweriyê de wekhevî ye, divê ev daxwaz pêk werin ev ê jî dê bi guherandina zagonan pêk were. Divê tevlibûna derdorên cuda yên civakê, jin, ciwan, kedkar, civaka sivîl, akademî û qada hiqûqê ya pêvajoyê pêk were. Divê gav bên avêtin û heqîqet, rûbirûmayîn û edalet pêk were.”
‘Aştî mijara civakê ye, aştiya civak lê xwedî dernekeve mayînde nabe’
Di dawiya axaftina xwe de Arîfe Çinar bi bîr xist ku ew wekî DEM Partî ji bo gel tev li pêvajoye bibe û qanûna çarçoveyî baş were fêmkirin, dixebitin û axaftina xwe wiha bi dawî kir: “Em wekî DEM Partî bi gelên Kurd û Tirk û derdorên cuda re tên gel hev û civînan li dar dixin. Ew civîn jî ji bo civakbûyîna pêvajo û aştî pêk tê û ji bo pêşerojê jî. Em plansaziya xwe dikin. Aştî mijara civakê ye, aştiya civak lê xwedî dernekeve mayînde nabe.”
