Wan – Gonul Alkan, di 23yê Sibatê de ji aliyê hevjînê xwe Kemallettîn Alkan ve li ber çavên zarokên xwe hat kuştin. Dayika Gonul Alkanê, Salîha Bozkûrt rexne li Midûriyeta Polîsan kir û got: “Polîsan keça min neparast. Êdî bes e, bila keç û ciwanên me nemirin.”
Li Tirkiyeyê û Bakurê Kurdistanê di rojekê de 6 jin bi tundiya mêran hatin qetilkirin. Ji van trajediyan yek jî li navçeya Tuşba ya Wanê qewimî. Gonûl Alkan a 33 salî, di 23yê Sibatê de ji aliyê hevjînê xwe Kemallettîn Alkan ve li ber çavên zarokên xwe hate kuştin. Dayika çar zarokan Gonûl, li gel hevjînê xwe di dema hevberdanê de bû û derbarê hevjînê wê de jî biryara dûrxistinê hatibû girtin. Dayîka Gonûl Alkanê, Salîha Bozkurt bertek nîşanî tundiya li ser jinan da û hikûmetê rexne kir.
‘Gelek caran gilî kir, lê tiştek neguherî’
Salîha Bozkurt ani ziman ku keça wê gelek zext û zorî ji hevjînê xwe dîtiye û got: “Gelek caran li keça min dixist. Çend caran keça min ji bo alîkariyê çû qereqolê, lê tu encam ji wir negirt. Polîsan ji keça min re digot ku biçe nexweşxaneyê û rapora tenduristiyê bigire ku ew bibin alîkar. Polîsan keça min neparast. Keça min gelek caran gilî kir, çû qereqolê, lê tiştek neguherî. Tenê digotin ‘Em li ku derê rastî wî werin, em ê wî bigirin’. Ji ber vê yekê jî tiştek nehat kirin.”
‘Ambûlans û polîs dereng hatin’
Salîha Bozkurt behsa kuştina keça xwe kir û wiha got: “Me gazî ambulans û polîsan kir, lê belê dereng hatin. Heta ku ew hatin, keça min li cihê bûyerê canê xwe da. Êdî bes e. Bila xwedî li me derkevin. Êdî bila keçên me û ciwanên me nemirin. Bila mirovên wiha kujer bi efûyekê serbest neyên berdan. Dilê min dişewite. Divê em çi bibêjin? Em çawa dengê xwe hîn bêtir bilind bikin? Ma em jî wekî wan bin? Ez qebûl nakim ku 20 sal ceza bidin wî. Ez dixwazim cezayê heta hetayê bigire. Ez naxwazim kujerên wisa bi efûyekê derkevin û dest û lingên xwe bihejînin û di nava kolanan de bigerin.”
