Platfomra Saziyên Demokratîk a Wanê bi daxuyaniyekê bertek nîşanî nevekirina rêya Wan û Colemêrgê da û got: “Gelê Van û Colemêrgê mafê veguhestina ewle û domdar dixwazin. Ev ne tenê veguheztinê asteng dike lê mafê jiyanê dixe xeteriyê.”
Platforma Saziyên Demokratîk a Wanê li dijî nevekirina rêya Colemêrg û Wanê ya ji ber hezazê hatiye girtin, li Qada Bajêr a navçeya Rêya Armûşê daxuyanî da. Di daxuyaniyê de pankarta “Rêya Wan û Colemêrgê girtî ye, têkilî qût bûye” hat vekirin. Tevî pêkhateyên platformê endam û rêveberên partiyên siyasî û welatî jî tevlî daxuyaniyê bûn. Metna daxiyaniyê rêveberê Dem Partiyê yê Wanê Yakup Almaç xwand.
Yakûp Almaç di daxuyaniyê de da zanîn ku rêya Wan-Colemergê bi qasî 20 rojan in hatiye girtin. Yakûp Almaç diyar kir ku her çend di van rojên dawî de hat gotin ku bi awayekî bi kontrol ji nû ve çûn û hatin dest pê kirine jî rê hêj nehatiye vekirin û got: “Lê rewşa heyî nîşan dide ku alozî hîn jî bi kûrahî berdewam dike. Piştî hezaza ku di 13ê Nîsanê de li devera Akçalî qewimî, rê demeke dirêj girtî ma. Tevî mudaxeleyan jî, tenê bi rêyek yekalî û bi şertên sînorkirî û demkurt derbasbûn hate pêkanîn.”
‘Ev rewşek e ku mafê jiyanê dixe xeteriyê’
Di berdewamiya axaftina xwe de Yakûp Almaç bal kişand ser mexdûriyata welatiyan û wiha pê de çû: “Rêya Wan û Colemergê girtî ye, welatî neçar dimînin ku bi ser Şirnexê ve bên û biçin û rêyên ku bi asayî çend saetan digirin, heta 9-10 saetan dirêj dibin. Ev tenê pirsgirêkeke veguhestinê nîne, rewşek e ku mafê jiyanê dixe xeteriyê. Aloziyeke berfireh heye ku bi temamî li ser medyayê û raya giştî xuya nake. Divê were zanîn ku girtina rêya bajêr, di heman demê de aboriya bajêr jî hêdî dike û jiyana rojane digihîne asta rawestandinê. Tevî daxuyaniyên rayedaran ku dibêjin xebat berdewam e, dîsa jî ne diyar e ku kengê rê dê bi awayekî ewle û bi tevahî vebe.”
‘Ev daxwaz mafek e ku nayê taloqkirin’
Yakup Almaç da zanîn ku ev alozî ne çarenûs e, encama polîtîkayên desthilatdaran e û axaftina xwe wiha bi dawî kir: “Desthilatdarên ku bi çêkirina rêyan berpisyar in careke din nîşan dan ku çawa bajarek bêalternatîf dihêlin. Gelê Wan û Colemêrgê mafê veguhestina ewle û domdar dixwazin. Ev daxwaz mafek e ku nayê taloqkirin. Heta ku çareseriyên mayînde nehatin hilberandin, ev rê tenê xeta veguhestinê nabe, lê dê her dem cîhekî xeter be ku krîzên nû lê çêbibin. Ji ber vê yekê, divê rayedar bi lez planek şefaf ragihînin, ji mudaxeleya demkurt derbas bibin û veberhênanên veguhestinê yên mayînde yên ku herêm salan e li bendê ye, bicîh bikin. Ji ber ku mijar tenê rêyek nîne, lê jiyana mirovan e. Di vê rê de ne tenê li devera hezazê, lê li gelek nuqteyan jî ji ber kêmasiyên binesazî û kêmasiyên teknîk, her sal dehan kes jiyana xwe ji dest didin. Divê bi lez dawî li vê tabloya ku qayimên Wan û Colemêrgê gelê me pê re rûbirû hiştiye bê anîn.”
