Platforma Lêkolînên Koçberiyê rapora xwe ya bi serenavê “Têvgerên Koçberiyê yên Muhtemel ên Piştî Pevçûna Îran-Amerîka-Îsraîlê” parve kir û hişyar kir ku heke pêşketinên leşkerî li herêmê berdewam bikin, divê îhtîmala zêdebûna tevgerên koçberan neyê paşguhkirin.
Platforma Lêkolînên Koçberiyê, Komeleya Lêkolîn û Çavderiya Koçê ya Mezopotamya, Çûkûrova û Stenbolê bi serenavê “Têvgerên Koçberiyê yên Muhtemel ên Piştî Pevçûna Îran-Amerîka-Îsraîlê” rapora xwe ya çavdêriya sehayê li avahiya Komeleya Lêkolîn û Çavderiya Koçê ya Mezopotamyayê ya li navçeya Sûrê ya Amedê bi civîneke çapemeniyê parve kir. Hevserokên Komeleya Lêkolîn û Çavderiya Koçê ya Mezopotamya Medya Alkan û Vecîh Aydogan metna raporê xwendin. Di beşa ketina raporê de hate ragihandin ku di 7ê Adara 2026an de li Deriyê Sînor ê Kapikoyê çavdêrî hatine kirin û wiha hate gotin: “Piştî êrîşên leşkerî yên ku Amerîka û Îsraîl li ser Îranê kirin, li herêmê gumana firehbûna şerê zêde bûye û li welatên cîran ên Îranê jî nîqaşên derbarê tevgerên koçberiyê dest pê kirine. Ji ber ku Tirkiyeyê sînorekî dirêj bi Îranê re heye, hat ragihandin ku ev welat ji bo tevgerên koçberiyê yên biguman yek ji xalên girîng ên derbasbûnê ye. Ji ber vê yekê jî li Deriyê Sînorê Kapikoy li sehayê çavdêriyek hat kirin.”
Armancên xwe rêz kirin
Hate diyarkirin ku di raporê de çavdêriyên ku di dema serdana qadê de hatine kirin û nirxandinên li ser tevgera mirovan a li deriyê sînor hene û armancên xwe yên çavdêriyê, rêbaza çavdêriyê, çavdêriyên qadê, tevgera giştî, profîla kesên sînor derbas kirine, derbasbûna hemwelatiyên Îranê,xebatên bazirganî û nirxandina derbasbûna wesayîtan rêz kirin.
‘Divê îhtîmala zêdebûna tevgerên koçberan neyê paşguhkirin’
Di beşa encam û pêşniyaran a raporê de jî wiha hate gotin: “Çavdêriyên sehayê yên li Deriyê Sînor ê Kapikoyê ku di 7ê Adara 2026an de hatin kirin nîşan didin ku pêleke koçberiyê ya zê de ku dihate payîn di rojên ewil ên şer de çêbibe pêk nehatiye. Lêbelê, heke pêşketinên leşkerî li herêmê berdewam bikin, divê îhtîmala zêdebûna tevgerên koçberan neyê paşguh kirin. Ji ber vê yekê, girîng e ku li herêmên sînorî amadekariyên mirovî werin xurtkirin, di çarçoveya mafên koçberan de mekanîzmayên parastinê werin avakirin û koordînasyona di navbera reveberiyên herêmî, saziyên sivîl ên civakî û saziyên cemaweriyê de were zêdekirin.”
Di dawiya raporê de wiha hate gotin: “Platforma Koçberiyê dê şopandina pêşketinên li herêmê û çavdêriyên qadê yên li ser tevgerên koçberan bidomîne.”
