Ajansa Mehr News a nêzî dewleta Îranê hûrgiliyên pêşnûmeya mutabaqateke ji 14 xalan eşkere kir ku di navbera Tehran û Washingtonê de muzakereya wê tê kirin.
Ajansa Mehr Newsê ya ser bi dewleta Îranê ve di nûçeya xwe de ku agahî spart çavkaniyên nêzî heyeta muzakereyê ya Îranê, detayên pêşnûmeya peymaneke ji 14 xalan eşkere kir ku tê gotin, Tehran û Washington li ser wê dixebitin.
Li gorî pêşnûmeyê, yek ji xalên herî girîng ên peymanê ew e ku li hemû eniyan agirbesteke mayinde bê ragihandin. Hate ragihandin ku Lubnan jî wê bikeve nava agirbestê û vekişîna hêzên DYE’yî yên li dora Îranê jî di çarçoveya peymanê de ye.
Tengava Hurmuzê wê jinûve bê vekirin
Di metna pêşnûmeyê de tê destnîşankirin ku dorpêça deryayî ya DYE’yê ya li ser Îranê wê bê rakirin û Tengava Hurmuzê ya ku stratejîk e di bin kontrola Îranê de di nava 30 rojî de jinûve li trafîka deryayî ya navneteweyî bê vekirin.
Tê gotin, jinûve vekirina Tengava Hurmuzê ku beşeke girîng a bazirganiya enerjiyê ya global jê derbas dibe, wê bazara enerjiyê hinekî rehet bike ku ji ber şer hejiya bû.
Rakirina pêkanînên petrolê û fona ji 300 milyar dolarî
Li gorî heman çavkaniyê, di pêşnûmeyê de tê ragihandin ku pêkanînên li ser petrolê û sektora petrokîmya ya Îranê wê bêne rakirin.
Li gel vê yekê tê plankirin ku bi fînansmana Dewletên Yekbûyî yên Amerîkayê (DYA) û hevalbendên wê re bernameyekek jinûve avakirinê ya ji 300 milyar dolarî bê avakirin. Tê gotin, fon a navborî wê ji bo çareserkirina xisara binesazî û aboriyê ya ji ber şer rû da, bê bikaranîn.
Muzakereyên nukleerî
Pêşnûme diyar dike ku di mijara bernameya nukleerê ya Îranê de ji bo lihevkirineke dawî pêvajoyeke nû ya danûstandinan a ji 60 rojî bê destpêkirin.
Tê plankirin ku di vê demê de maldariya ji 24 milyar dolarî ya Îranê ya hate cemidandin bê berdan û 12 milyar dolarê vê yekê beriya destpêkriina hevdîtinan ji bikaranîna Tehranê re bê pêşkêşkirin.
Di berdêla vê de jî tê gotin ku Îran wê dilsoziya xwe ya bi berpirsyariyên Nuclear Non-Proliferation Treaty (NPT) careke din piştrast bike.
Hîn bi rengekî fermî nehatiye erêkirin
Metna pêşnûmeyê ku ji aliyê Mehr Newsê ve hate weşandin, ji bo lihevkirina aliyan çarçoveyekê danî be jî heta niha ne Washingtonê ne jî rêveberiya Tehranê xalên navborî bi fermî erê kirine.
