Platforma Jinan a Îzmîrê der barê êrîşên li ser Helebê daxuyanî da û diyar kir ku armanca êrîşên li ser Sûriye û Rojava tunekirina fikra jiyana azad û şikandina vîna jinan e.
Platforma Jinan a Îzmîrê ji ber deriyê avahiya OSYMê heta ber Navenda Çandê ya Turkan Saylanê meşek li dar xist û dawiya meşê de daxuyaniyek da. Di meşê de girse dirûşmên ‘Bijî berxwedana jinan’, ‘Bijî berxwedana Rojava’, ‘Bijî ji wan jinên ku li Rojava li ber xwe didin” û “Dîsa dîsa serhildan, azadiya Kurdistan” berz kirin û dovîzên “Jin, Jiyan,Azadî” bilind kirin.
Newroz Çelîk li ser navê platformê daxuyanî xwend. Newroz Çelîk sedema civîna jinan wiha anî ziman: “Em îro li dijî dorpêça cîhadîst a ku ber bi Rojava ve diçe û polîtîkayên şer ên ku îdiaya jiyana azad a jinan ji xwe re dike hedef dengê xwe bilind bikin, li hev civiyane.”
Newroz Çelîk di daxuyaniyê de bal kişand ser hovîtiya li taxên Şêxmeqsûd û Eşrefiyê û got: “Li wir jineke kurd dawî li jiyana xwe anî lê mixabin piştî dawî li jiyana xwe anî bedena wê hate teşhîrkirin û ew ji avahiyekê hate avêtin. Şerên li Şêxmeqsûd û Eşrefiyeyê rasterast karaktera şeran bi me da nîşan. Di şer de bedena jinan, rasterast hedef e. Armanc ew e ku vîna jinan bê şikandin, civak teslîm bê girtin û fikra jiyana azad bê tunekirine.”
Newroz Çelik di vê çarçoveyê de daxwaziyên Platformê wiha yek bi yek rêz kir:
“-Divê êrîşên li ser Sûriyeyê demildest bêne rawestandin.
– Divê ji bo taxên ku di bin bandora şer de ne, korîdora mirovî bêne vekirin.
– Divê êrîşên li ser Rojava bi dawî bibin.
– Divê qadên têkoşînê û destkeftiyên ku jinan ava kirine, bêne misogerkirin.
– Divê sûcên şer ji aliyê mekanîzmayên navneteweyî yên serbixwe ve bên lêkolînkirin û kujer bêne darizandin.
– Divê dawî li destwerdanên emperyalist bêne anîn.”
Di dawiya daxuyaniyê de Newroz Çelik bang li saziyên navneteweyî, rêxistinên jinan û raya giştî ya demokratîk kir û got: “Li dijî sazûmaniyên cîhadîst, desthilatdarên herêmî û hêzên emperyalist bibin yek û bikevin nava liv û tevgerê.”
