Serokkomarê Îranê Mesûd Pezeşkiyan bi Serokkomarê Fransayê Emmanuel Macron bi rêya telefonê axivî û Dewletên Yekbûyî yên Emerîkayê (DYA) bi xiyanetê sûcdar kir.
Mesûd Pezeşkiyan bi rêya telefonê bi Emmanuel Macron re axivî û bi zimanekî tund DYA rexne kir. Li gorî daxuyaniya ku ji aliyê Serokkomariya Îranê ve hate weşandin, Mesûd Pezeşkiyan helwesta Washingtonê bi gotina “xiyanetê” sûcdar kir û wiha hat gotin: “Washington ji dîplomasiyê dûr ket û berê xwe da rêya gef, zext û pêkanînan. Ji ber vê yekê jî Îran nikare baweriya xwe bi DYAyê bîne.”
Rêveberiya Tehranê diyar kir ku bi DYAyê re du caran pêvajoya danûstandinê hate destpêkirin, lê belê her du caran jî di dema pêkhatina hevdîtinan de êrişên leşkerî li hemberî Îranê hate kirin. Serokatiya Îranê got: “Ev helwest dişibe xiyanetê.”
Pezeşkiyan bi dewamî anî ziman ku muzakereyên jinûve li ser vekirina Tengava Hurmuzê, tenê dema ku dorpêça DYAyê ya deryayî bi dawî bûye, dikare pêk were.
DYA: Em gihîştin armanca xwe
Berdevkê Wezareta Karên Derve ya DYAyê Tommy Pigott jî îdîa kir ku di çarçoveya Operasyona Epic Fury de ew gihîştine armancên xwe. Pigott ji qenala Al Jazeera ya ji Qatarê re axivî û îdîa kir ku hêzên Îranê di asteke girîng de hatine lawazkirin.
Pigott her wiha destnîşan kir ku ti welat nikare biryarê bide ku wê kî yê rêyên deryayî yên navneteweyî bi kar bînin.
Pigott anî ziman ku Serokê DYAyê Donald Trump çareseriya dîplomatîk tercîh dike û got: “Trump di mijara ku divê Îran ti carî nebe xwedî çeka nukleerî gelekî cidî ye.”
‘Ne tê astengkirin ne jî amûreke şantajê ye’
Li aliyê din Wezîrê Karên Derve yê Fransayê Jean-Noel Barrot jî daxuyanî da radyoya RTLê û anî ziman ku Tengava Hurmuzê “Nirxê hevpar ê mirovahiyê. Tengavek ne dikare bê astengkirin ne jî weke amûreke şantajê bê bikaranîn” û diyar kir ku heta tengav girtî be divê ti ji danekirinên li ser Îranê neyên rakirin.
Wezîrê Fransayê her wiha got, keştiya balafiran Charles de Gaulle ber bi herêmê ve diçe û diyar kir ku ev yek sekna parastinê ya Fransayê xurt dike.
Swîsre: Ji bo malovaniyê em amade ne
Berdevka Wezareta Karên Derve ya Swîsreyê Mélanie Gugelmann jî anî ziman ku welatê wê ji bo hevdîtinên gengaz ên navbera DYE û Îranê amade ye ku mazûvaniyê bike.
Gugelmann ji ajansa nûçeyan a Rus TASSê re axivî û got: “Swîsre her tim amade ye ku piştgiriyê bide hewldanên dîplomatîk ên bi nêta baş.” Tê gotin, Cenevre dikare bibe yek ji navendên muzakereyeke gengaz.
