Komîsyonêk ji partiyên siyasî pêk tê li pêşiya Girtîgeha Sîlîvriyê daxuyanî da û nûnerên partiyan diyar kirin ku heta girtiyên siyasî werin berdan dê têkoşîna wan berdewam bike.
Komîsyonek ji DEM Partî, CHP, EHP, EMEP, TÎP, TOP, SMF û pêkhateyên DEM Partiyê pêk tê îro ewilî li Girtîheha Edîrneyê bi Selahattîn Demîrtaş û Selçuk Mizrakli re bi rêya parêzeram hevdîtîn pêk anîn. Komîsyon paşê çû li pêşiya Girtîgeha Sîlîvriyê û li ser navê komîsyonê parêzeran bi Parlementerê TÎPê yê Hatayê Can Atalay, parêzvanên mafên mirovan Osman Kavala û Tayfûn Kahraman re hevdîtîn pêk anîn. Piştî hevdîtinê pêşiya girtîgehê daxuyanî hate dayîn.
‘Divê êdî zagon werin derxistin’
Hevserokê Giştî ye DEM Partiyê Tuncer Bakirhan, serokên giştî yên partiyên siyasî, rêveberên partiyên siyasî, rêxistinên DEM Partî û CHPê yên Stenbolê û gelek welatî tev li daxuyaniyê bûn. Li vir ewilî Serokê Giştî yê EHPê Hakan Ozturk axivî û got: “Berî salekî gelek tişt pêk hatin. Rêya aştiyê vebû, em jî êdî dixwazin gav bên avêtin. Ji bo vekirina rê jî ev gav girîng in. Divê êdî zagon werin derxistin.”
‘Aliyek aştî aliyek girtin nabe’
Paşê Hevserokê DEM Partiyê Tuncer Bakirhan axivî û destnîşan kir ku îro gelê Tirkiye li hemberî pêvajoyê bebaweriyê dijî û wiha axivî: “Gel şaredar û parlamenteran hildibijêre lê nûnerên hatin hilbijartin tên girtin. Bekîr Kaya ev 10 sal e girtiye, lê gelê Wanê ji 14 şaredaran tevahiya wan bi dest xist. Aliyek aştî aliyek girtin, aştî wisa nabe. Hevalên me yên girtî divê demildest werin berdan. Heta werin berdan jî têkoşîna me dê berdewam bike.”
SMF: Têkoşîna me ya azadiyê nayê rawestandin
Berdevkê SMFê Mahîr Gurz jî anî ziman ku ji derve û mal de herder îro bûye girtîgeh û wiha pêde çû: “Girtîgeha ku em li pêşiya wê ne jî nîşaneya wê ye. Hezaran hevalên me îro li vir in. Çawa duh em li dijî wan sekinîn îro jî têkoşîna me ya azadiyê nayê rawestandin. Ji bo girtî serbest bên merdan em dê li berxwe bidin.”
TOP: Em dê serbikevin
Endama Lijneya Berdevkan a TOPê Julîana Gozen jî bi bîr xist ku ew dîsa pêşiya girtîgehekî ne û ev tişt gotin: “Em li vir, li pêşiya girtîgehekê ne. Em dîsa dibêjin kesên ku ji bo azadiyê têkoşiyane werin girtin jî tu carî serî natewînin. Çawa ku gelê Wanê li dijî qeyûm li berxwe da, ev berxwedan jî nîşaneya serkeftinê ye. Em dê serbikevin.”
Piştî axaftinan daxuyanî bi dawî bû.
