Serokê Giştî yê CHPê Ozgur Ozel ku bi biryara “Batalkirina teqez” ji peywîrê hatibû dûrxistin diyar kir ku ew dê sibê li Meclîsê komcivîna partiya xwe li dar bixin û wiha got: “Me biryar girtibû ku em vê hefteyê komcivînê nekin. Lê Kemal beg firset dît û got em ê komcivînê bikin. Li ser vê yekê me jî biryar girt ku em vê hefteyê komcivînê li dar bixin.”
Serokê Giştî yê CHPê Ozgur Ozel ku bi biryara “Batalkirina teqez” ji peywîrê hat dûrxistin piştî civîna Desteya Rêveberiya Navendî ya CHPê li Meclîsê daxuyanî da.
Ozgur Ozel da zanîn ku wan ji bo ew sibê li Meclîsê komcivîna xwe li dar bixin serî li Meclîs dane û wiha got: “Ez ê sibê di komcivîna Meclîsê de biaxivim. Me biryar dabû ku em vî hefteyê komcivînê nekin û ji bo bîranîna Ferdî Zeyrek biçin Manîsayê. Lê em piştre hîn bûn ku Kemal Beg vê yekê firset dîtiyê û tevî tu mafê xwe tune ye û li kolanan bertekên gel li dijî wî hene jî got ez ê li Meclîsê komcivînê bikim. Li ser vê yekê me jî biryar girt ku em li Meclîsê komcivînê bikin. Ya ku Kemal beg bike ew e ku kongreyê kom bike û bi hilbijartinê em Serokê Giştî diyar bikin. Em bang li endamên xwe dikin ku sibê werin tev li komcivînê bibin. Divê Kemal beg jî dev ji rêbazên bi vî rengî berde.”
