Berdevkê AKPê Omer Çelîk diyar kir ku amadekariyên wan ên pêvajoyê didome û got: “Em her roj civînan dikin û li ser dixebitin. Înşallah heta meclis neketiye betlaneyê em ê qanûna çarçoveyî derxînin.”
Berdevkê AKPê Omer Çelîk tekildarî geşedanên rojevê li navenda giştî ya partiya xwe daxuyanî da. Omer Çelîk bi lêv kir ku wan tekildarî pêvajoyê, geşedanên li herêmê û rewşa siyasî di civîna Desteya Rêveberiya Navendî de nirxandinên berfireh kirine. Omer Çelîk tekildarî pêvajoyê anî ziman ku ew di merhaleyeke nû de ne û wiha axivî: “Merhaleya nû ew e ku ji bo çek ji dewrê rabin zemîna hiqûqî ye. Gelek aliyên vê pêvajoyê yên weke hiqûqî û civakî hene. Ew polîtîkayeke dewletê ye. Em heta vir hatin ew girîng e. Mesele hê nû destpê dike. Helbet avakirina zemîneke hiqûqî girîng e. Di vê pêvajoyê de rexneyên erênî girîng in lê li ser navê rexneyan, rexneyên hildiweşînin bi pirsgirêk in. Me gelek caran ji bo demokratîkbûyina Tirkiyeyê reform kirin.”
‘Merhaleya em gihîştinê merhaleyeke krîtîk e’
Di berdewama axaftina xwe de Omer Çelîk îddîa kir ku li Tirkiyeyê hemû welatî wekhevin û got ku pêdivî bi zimanekî erênî û heşmendiyeke berfireh heye. Omer Çelîk bi lêv kir ku pêvajo karekî zirav dixwazê û wiha pê dê çû: “Em bi rihetî nehatin vê aste. Tevî sabotajên tên zanîn û neyên zanîn jî ew pêvajo bi rê ve çû. Merhaleya em gihîştinê merhaleyeke krîtîk e. Divê hemû kes li dijî sabotaja pêvajoyê bi hestiyar tevbigere. Heke em gehiştin Tirkiyeya bê teror hemû welatiyên me dê xwe zemîneke hê baştir bibînin. Ji bo wê îro ne dema ku em bi awayekî tund lê bi awayekî ku destê hev bigirin biaxivin. Heke em bikarin pirsgirêkan biaxivin em ê bikarin di pêşerojê de bi hev re bimeşin. Heke em îro ji bo li ser avakirina zemîna siyasî lihevkirineke xurt bikarin destê hev bigirin em ê bikarin pêşerojê jî bi hev re mil bi mil bimeşin.”
Omer Çelîk diyar kir ku amadekariyên wan ên pêvajoyê didome û wiha pê de çû: “Em her roj civînan dikin û li ser dixebitin. Înşallah eta meclis neketiye betlaneyê em ê qanûna çarçoveyî derxînin.”
Çelîk bertek nîşanî êrişên Îsraîlê li ser Şerîaya Rojhilat da û bang kir ku divê hemû dinya li dijî van êrişan bi hestiyar tevbigere.
Omer Çelîk li ser pirsên rojnamegeran jî ragihand ku heta meclis neketiye betlaneyê ew ê qanûnê bînin meclisê lê dîrok hê ne diyar e.
Çelîk tekildarî pîrozbahiyên 24 saliya AKPê jî got ku ew ê di 1ê Tebaxê de heta 14ê Tebaxê pîrozbahiyan bikin û logoya xwe ya nû jî îlan bikin.
