Înîsiyatîfa Malbatên Pirsûsê ji bo 33 ciwanên di êrîşa DAIŞê de jiyana xwe ji dest dabûn, her meh li ber Navenda Çandê ya Turkan Saylan a li Alsancakê li dar dixin.
Înîsiyatîfa Malbatên Pirsûsê, ji bo bibîranîna 33 ciwanên ku di 20ê Tîrmeha 2015an li navçeya Pirsûs a Rihayê di encama êrişa bombeyî ya DAIŞê de jiyana xwe ji dest dabûn, çalakiya xwe ya ku her meh li ber Navenda Çandê ya Turkan Saylan a li Alsancakê li dar dixin, domandin.
Di daxuyaniyê de pankarta “Tu xeyal nîvco namîne” hat vekirin û wêneyên 33 kesên ku canê xwe ji dest dabûn hatin hilgirtin. Di daxuyaniya ku gelek welatî beşdar bûn, gelek caran sloganên wekî “Ji Pirsûsê re edalet, ji her kesî re edalet”, “Rojava em ê dîsa werin cem te”, “Hesabê Pirsûsê dê bê pirsîn”, “Em ê hesabê Amed, Pirsûs, Enqere bipirsin” hatin berzkirin. Daxuyaniya li ser navê Înisiyatîfa Malbatên Pirsûsê ji aliyê Koray Turkan ve hate xwendin.
Koray Turkan diyar kir ku beriya 126 mehan, bi sedan kesên ku piraniya wan xwendekarên zanîngehê bûn û ji bo avakirina bajarekî wêrankirî derketibûn rê, li navçeya Pirsûs a Rihayê, li cihê ku lê bêhna xwe vedidan, rastî êrişeke xwekujî hatin. Di encama vê êrişê de 33 rêhevalên me canê xwe ji dest dan, bi sedan hevalên me jî birîndar bûn û got: “Doza Komkujiya Pirsûsê, tenê bi kesê ku êriş pêk aniye ve sînordar hate girtin; plankerên komkujiyê, kesên teşwîq kirine û wezîfedarên giştî yên ku îhmala wan heye derneketin pêşberî darazê. Ev rewş, nîşaneya polîtîkaya bêcezahiştinê ye.”
Koray Turkan bi bîr xist ku her çendî beriya komkujiyê gelek belge û agahî hebûn ku êrişkar û şaneya DAIŞê ya ku faîl di nav de ye di bin çavdêriya yekîneyên ewlehiyê de ne; lê dîsa jî ev agahî nebûn mijara lêpirsîneke rasteqîn û got: “Berpirsiyariya yekîneyên îstîxbarat û emniyetê hate piştguh kirin û bi biryara ‘xefkirina’ li ser dosyayê, rê li ber rastî û heqîqetê hatê girtin. Îro em careke din tînin ziman: Komkujiya Pirsûsê ne êrişeke serbixwe ye, komkujiyeke rêxistinkirî ye. Ji ber vê yekê divê ne tenê kujer, lê her kesê ku rê li ber vê komkujiyê vekiriye were darizandin.”
Koray Turkan wiha daxwaziyên însiyatîfê yek bi yek rêz kir:
– Bila hemû failên rastî yên ku di komkujiyê de berpirsiyariya wan heye werin eşkere kirin,
– Bila derbarê wezîfedarên giştî yên ku îhmal û berpirsiyariya wan heye de lêpirsîneke bi bandor û serbixwe were meşandin,
– Bila bersûcên fîrarî werin girtin û derxin pêşberî dadgehê,
– Bila Komkujiya Pirsûsê wekî sûcekî li dijî mirovahiyê were hesibandin û demborî neyê sepandin,
– Em daxwaza darizandineke adil, şefaf û bi bandor dikin.
Daxuyanî bi çepik û dirûşman bi dawî bû.
