Stenbol – Siyasetmedar Çîgdem Ozlu ji sala 2022yan ve li Girtîgeha Jinan a Bakirkoyê tê girtin û nexweşiyên wê yên penceşêra guatrê, jana zirav û astimê hene. Hevjînê Çîgdem Ozlu, Yaşar Ozlu diyar kir ku di demên dawiyê de encamên nexweşînên wê baş derneketin û wiha got: “Tevî ku nexweşiyên Çîgdemê hene jî Saziya Tipa Edliyê biryar da ku dikare di girtîgehê de bimîne û divê bê emeliyatkirin. Em nizanin ku niha rewşa Çîgdemê çawa ye.”
Çîgdem Ozlu ya ku 49 salî ye û di Girtîgeha Jinan a Bakirkoyê ya Stenbolê de tê ragirtin. Çîgdem Ozlu girtiyek nexweş e û nexweşiyên wek penceşêra guatrê, jana zirav û astim hene. Di sala 2022yan de 6 sal û 3 meh cezayê ku bi îdiaya “endama rêxistinê” lê hatibû birîn, hate erêkirin û ev nêzî 4 sal in girtî ye. Hê salek û 6 meh cezayê wê maye. Çîgdem ji malzaroka xwe emeliyat bûye. Tevî ku nexweşiyên wê giran in jî nayê berdan û Saziya Tiba Edlî (ATK) biryara daye ku girtî bimîne. Çîgdem Ozlu di sala 2009an de serokatiya Şaredariya Navçeya Qaqizmanê ya Qersê kiriye û bi salan di nav têkoşîna azadiyê ya jinan de xebitî ye. Ji sala 2009an heta sala 2014an li navçeya Qaqizmanê ya Qersê cîgira serokatiya şaredariyê kiriye. Piştre jî xebatên xwe yên siyasî didomîne, tê girtin û berdan.
Yaşar Ozlu derbarê rewşa hevjîna xwe Çîgdem Ozlu de axivî û bal kişand ser rewşa tendûristiya hevjîna xwe.
Çar sal in girtî ye
Yaşar Ozlu diyar kir ku Çîgdem Ozlu siyasetmender bû û di sala 2009an de li navçeya Qaqizmanê serokatiya şaredariyê kiriye û wiha axivî: “Çîgdem di sala 2006an de li Agiriyê hate girtin. Piştî hate berdan têkoşîna xwe berdewam kir. Piştî ku pêvajoya aştiyê ya di sala 2015an xirabû, di sala 2015an de ez hatim girtin û piştî ez hatim berdan heval Çîgdem di sala 2016an de hate girtin û 6 mehan girtî ma. Piştî hate berdan dozê berdewam kir. Ez dîsa di sala 2019an de hatim girtin, piştî berdana min 15 rojan cezayê heval Çîgdem hate birîn. Bi hinceta endama rêxistinê ye 6 sal 3 meh ceza lê hate birîn. Em jî hatin Stenbolê û di sala 2022yan de li Stenbolê Çîgdem hate girtin.”
‘Tevî serdana me jî nexweşiya wê nehat dîtin’
Yaşar Ozlu destnîşan kir ku nexweşiya penceşerê û nexweşiyên din ên Çîgdemê hene û û wiha got: “Nexweşiyên wê penceşêra guatrê, jana zirav û astim hene. Ji ber nexweşiya astimê divê di hucreya yek kesî de nemîne lê bi sedema li dijî lêgerîna tazî çalakî kiriye wê avêtin hucreyê û 40 rojan li wir hate ragirtin. Di demên dawiyê de encamên nexweşiyên wê baş derneketin û wê emeliyat bibe. Tevî ku nexweşiyên Çîgdemê hene jî Saziya Tipa Edlî (ATK) biryar da ku dikare di girtîgehê de bimîne. Divê ji qirika xwe emeliyat bibe. Îro di girtîgehê de bi hezaran kes tên mexdûrkirin. Em nizanin ku niha rewşa Çîgdem çawa ye? Kengê emeliyat bibe tu agahî nedan me. Keça min xwest dema emeliyatê li gel dayika xwe bibe lê bersiv nedan me. Bi banga Serokatî pêvajoyek dest pê kiriye jî girtiyên nexweş nayên berdan û mafên girtiyan tên binpêkirin. Em ê heta dawiyê girêdayî Serokatiya xwe bin. Îro li Girtîgeha Bakirkoyê rewş nebaş e. Girtiyên nexweş hene, dayikek 80 salî heye lê nayê berdan. Dema ku mijar Kurd bin cîhan jî bêdeng dimîne.”
