Rejîma Îranê destûr nade ku girtiya siyasî ya Kurd Zeyneb Celaliyan a di girtîgeha Îranê de ye, ji mafên xwe yên hevdîtina malbatê û dermankirinê sûdê bigire.
Ajansa HRNAyê ragihand ku girtiya siyasî ya Kurd Zeyneb Celaliyan ku yek ji girtiyên jin ên siyasî ya herî kevne di girtîgehên Îranê de ye û tevî nexweşiyên xwe ji mafên xwe yên dermankirin û hevdîtina li gel malbatê de bêpar hatiye hiştin. Li gorî nûçeya HRNAyê berpirsên girtîgehê rê nadin encamên test û filîmên ku beriya niha li nexweşxaneyê ji bo Zeyneb Celaliyan hatine girtin, werin eşkerekirin. Hate eşkerkirin ku ji destpêka meha Îlonê ya îsal ve bi fermana Wezareta Îtlaetê ve mafê hevdîtina Celaliyan a li gel malbatê hatiye qedexekirin.
Di nûçeyê de hatiye diyarkirin ku di dawiya meha Hezîranê de ji aliyê Wezareta Îtaletê ve zext li Zeyneb Celaliyan hatiye kirin daku peşîmantiya xwe ragihîne, lê Celaliyan ev daxwaz red kiriye. Zeyneb Celaliyan di sala 1982yan de li bajarê Mako yê ser bi parêzgeha Urmiye ya Rojhilatê Kurdistanê ji dayîk bûye. Di sala 2008an de li Kirmaşan hat binçavkirin û bi tometa ‘Hewldana li dijî asayîşa nîştimanî û şerê li dijî xweda’ cezayê bidavekirinê lê hat birîn. Lê dadgeha temyîzê piştre cezayê wê guherî yê heta hetayî.
