MKGê di rapora xwe ya binpêkirina mafên jinên rojnamevan a meha Îlonê de diyar kir ku binpêkirina mafên jinên rojnamevan zext û zordestiyan dewam kiriye û di raporê de hat ragihandin ku 5 rojnamevanên jin hîn jî girtî ne.
Komeleya Rojnamevanên Jin a Mezopotamyayê (MKG) rapora binpêkirina mafên rojnamevanên jin a Îlona 2025an aşkere kir. Li gor rapora MKGê meha Îlonê jî rojnamevan bi zext û zordariyê re rû bi rû mane û 5 rojnamevanên jin hîn jî girtî ne.
Di berdewama raporê de ev tişt hatin destnîşankirin:
“Di meha Îlonê de zextên li ser rojnamevanên jin berdewam kirin. Rojnamevanên ku nûçeyan dişopînin û rastiyê ji raya giştî re radigihînin, hem ji ber pîşeya xwe û hem jî ji ber nasnameya xwe bûn hedef.
Rojnamevan dema ku li kolanan, li dadgehê, an jî di dema binçavkirinê de nûçeyan dişopînin, zext li wan tên kirin û tên astengkirin. Tevî vê yekê jî, ew di lêgerîna xwe ya rastiyê de israr dikin. Îro, rojnamegerî li Tirkiyeyê ne tenê pîşeyek e; ew bûye têkoşînek ji bo rastiyê.
Rojnamevan Heval Arslan, di meha Îlonê de li Belçîkayê hat binçavkirin, vê yekê jî nîşan da ku zextên li ser rojnamevanên jin ne tenê bi Tirkiyeyê ve sînordar in. Hedefgirtina rojnamevanên jin ên Kurd li Ewropayê nîşanek eşkere ya nerehetiya li hember hêza têkoşîna jinan ji bo çapemeniya azad e. Vê rewşê careke din girîngiya hevgirtina navneteweyî ya di navbera rojnamevanan de derxist holê.
Li gel zordariya dewletê, şîdeta mêran û sansurê, rojnamevan bi pênûsa xwe bi berdewamî li ber xwe didin. Ji bo wan, ragihandina nûçeyan ne tenê erk e; ew beşek ji lêgerîna wan a ji bo azadî û wekheviyê ye.
Di demên dawî de, girtina hesabên medyaya dîjîtal, sînordarkirinên gihîştinê û sansura dîjîtal wekî rêbazên nû ji bo bêdengkirina dengê rojnamevanan derketine holê. Lêbelê, jin, bi rêya hevgirtinê, li kolanan dengê xwe bilind dikin.Tevî hemû zextan, rojnamevan mafê raya giştî yê agahdariyê diparêzin û rastiyê radigihînin. Ji ber ku çapemeniya azad bi wêrekî û wijdanê ku ji pênûsa jinan tê afirandin li ser lingan disekine.”
Li gor raporê 4 rojnamevan bi êrişê re rû bi rû amne, bi ser mala rojnamevanekê de hatiye girtin, ji bo îfadeyê gazî rojnamevanekê hatiye kirin, 2 rojnamevan gef li wan hatine xwarin û 3 rojnamevan jî di dema şopandina nûçeyan de hatine astengkirin. Li gel vê der barê 5 rojnamevanan de lêpirsîn hatiye vekirin û der barê 3 heban d ejî doz hatiye vekirin.
Li gor raporê 4 rojnamevan doza wan didome û ji 4ê Çileya 2023yan ve 5 rojnamevanên jin girtî ne.
