Dêrsim – Hevseroka Giştî ya KESKê Ayfer Koça, diyar kir ku dê li pêvajoya aştiyê xwedî derkevin û destnîşan kir ku şertên ku aştî lê tune be demokrasî ne pekan e.
23yemîn Mihrîcana Çand û Xwezayê ya Mûnzûrê ku bi dirûşma “Dêrsim jiyan e; dest nede xwezaya min, vîna min, zimanê min, baweriya min” tê lidarxistin di roja 3yemîn de didome. Panela bi serenavê “KHK, îxrac û geşedanên siyasî” li Kolana Hunerê bi moderatoriya Hevseroka Şaxa Komeleya Mafên Mirovan (ÎHD) a Dêrsimê Nûrşat Yeşîl ve hate lidarxistin.
Hevseroka Giştî ya Konfederasyona Sendîkayên Kedkarên Cemaweriyê (KESK) Afyer Koçak, diyar kir ku têkoşîna kedê parçeya herî girîng a pêvajoya demokrasiyê ye û 135 hezar mexdûrên KHKê bi bîr xist. Ayfer Koçakê, bal kişand ser Pêvajoya Aştî û Civaka Demokratîk a ku Rêberê Gelê Kurd Abdullah Ocalan daye destpêkirin û ev tişt got: “Ji aliyekî ve qala aştiyê tê kirin û ji aliyê din ve jî şaredar, ciwan tên girtin. Şertên ku aştî lê tunebe demokrasî ne pekan e. Şer herî zêde zirarê dide karkeran. Avakirina mercên aştiyê berpirsiyariya me ye. Em ê xwedî li pêvajoya aştiyê derbikevin û ji bo xurtkirina demokrasiyê bixebitin.”
‘Ji tenduristiya civakî re tenduristiya siyasî pêwîst e’
Hevserokê Giştî yê Sendîkaya Kedkarên Tenduristî û Xizmetên Civakî (SES) Mehmet Siddik Akin, rave kir ku rewşa KHKê li milyon û nîv kesan bandor dike. Akin ev tişt got: “Ji tenduristiya civakî re tenduristiya siyasî pêwîst e. Şer tenê ne li ser axê di leşê mirov de jî pirsgirêkan çêdike. Ji ber vê yekê ne tenê bi agirbestan divê hevrûbûna civakî, hevrûbûna bi heqîqetê ve pêvajoya aştiyê bê kirin.”
Panel piştî pirs û bersîvan bi dawî bû.
