Dersim – Walîtiya Dersimê zêdetirî salekî ye di avahiyên Zanîngeha Mûnzûrê de dimîne û li gel ku hatibû gotin ev rewş wê salekî berdewam bike jî heya niha walîtiyê nekariye avahiyek nû ji bo xwe çêbike.
Di 12î Îlona 2025an de Walîtî û Edliyeya Dersimê barkiribûn avahiyên Zanîngeha Mûnzûrê û piştî vê biryarê xwendekar û gelek derdoran bertek nîşanî vê yekê dabûn. Her çiqas wê demê hatibe gotin ku ev rewş tenê ji bo salekî dê bidome jî, heya niha guhertinek pêk nehatiye. Hê jî Walîtî û Edliyeya Dersimê di kampûsa nava zanîngehê de ne û xwendekar her roj bi hemû van karmendên dewletê re rû bi rû dimînin.
20 meh cezayê girtîgehê li 2 xwendekaran hat birîn
Piştî vê biryarê xwendekarên Zanîngeha Mûnzûrê ev biryar protesto kiribûn. Ji ber vê protestoyê li dijî gelek xwendekaran lêpirsîn hatibû destpêkirin. Ji xwendekarên ku lêpirsîn li dijî wan hatibû vekirin, li 2 kesan 20 meh cezayê hepsê hate birîn û ev biryar ji bo îstînafê hate şandin.
Rektor gotibû ev rewş dê tenê salekê berdewam bike lê hê jî didome
Piştî ku xwendekaran protesto kir, rektoriyê ji xwendekaran û raya giştî re daxuyaniyek dabû û gotibû ku ev rewş dê tenê salekê berdewam bike. Lê tevî ku di ser re salek derbas bûye jî, walîtî û edliye hê jî di kampusa zanîngehê de ne û derbarê derketina wan de agahiyek nû an jî amadekariyek tune ye.
Xwendekarên ku ji roja yekem ve nerazîbûna xwe tînin ziman, careke din ji Ajansa Welat re diyar kirin ku ew vê rewşê qebûl nakin û ji bo ku perwerdeya wan bi awayekî baş berdewam bike, xwestin ku her du sazî demildest ji kampusê werin derxistin.
Xwendekaran da zanîn ku rektor perwerdeya xwendekaran nade ber çavan û anîn ziman ku mafê wan ê herî xwezayî protesto ye lê rektor li dijî vî mafî darazê wekî amûrekê li dijî wan bi kar tîne. Serokê Şaxa Egîtîm Senê ya Dêrsimê Mehmet Aşkin jî bertek nîşanê vê rewşê da û got ku ev yek li dijî mafê perwerdeyê ya xwendekaran e.
‘Cara yekem e ku di nav kampusekê de avahiyên edliye û walîtiyê cih digirin!’
Mehmet Aşkin bal kişand ser veguhastina avahiyên walîtî û edliyeyê ya li nav kampûsa Zanîngeha Mûnzûrê û wiha got: “Ev rewş li tu welatî nehatiye dîtin; bi temamî rewşeke xerîb e û nayê fêmkirin. Ji ber ku cara yekem e ku di nav kampusekê de avahiyên edliye û walîtiyê cih digirin. Vê rewşê bandoreke xirab li ser jiyana rojane ya xwendekaran kir. Di heman demê de kedkarên perwerde û zanistê jî ji vê rewşê bandor bûn. Ji ber ku her du saziyan li kampusê trafîkeke giran a mirov û wesayîtan bi xwe re anî. Ji ber vê yekê kedkarên perwerde û zanistê jî di jiyana xwe ya kampusê de bi awayekî neyînî bandor bûn.”

‘Rektoriyê daxuyaniyeke nerast da’
Mehmet Aşkin diyar kir ku rektoriyê daxuyaniyek dabû û gotibû dê ji cihên cuda derî werin dayîn û wiha domand: “Lê ev gotineke nerast bû; ji ber ku li kampusê tu cih tune ye ku ji cihekî cuda derî were vekirin û tiştekî wiha qet ne pêkan e. Rektor bi xwe jî ev tişt dizanibû lê dîsa jî raya giştî xapand û îdia kir ku dê ji cihekî cuda derî were vekirin û xwendekar, kedkarên perwerde û zanistê, yanî kesên ku li kampusê ne, dê ji vê rewşê bandor nebin. Lê ev tişt qet rast nebû; ji ber ku ji bo wan cihan û van avahiyan tenê deriyek heye û astengkirina wî qet nabe. Vê rewşê jî her kes dizane.”
‘Pirtûkxane veguheriye avahiya edliyeyê’
Mehmet Aşkin bal kişand ser dirûşmeya bingehîn a Zanîngeha Mûnzûrê “Di zanistê de li pêş, di ramanê de azad” û wiha berdewam kir: “Lê ev îfade bi sepanên ku tên kirin re bi eşkereyî li dij hev e. Zanîngeha ku îdia dike di zanistê de pêş e, pirtûkxaneya wê bi xwe têrê nake û ev pirtûkxane jî bi avahiya edliyeyê re tê parvekirin.”
‘Divê demildest ev pirsgirêk were çareserkirin’
Mehmet Aşkin diyar kir ku divê demildest ev pirsgirêk were çareserkirin û axaftina xwe wiha bi dawî kir: “Em her cure pirsgirêk û pêdiviyên xwendekaran û kedkarên perwerde û zanistê dişopînin. Ji roja ku biryara veguhastinê hat girtin ve me îtîrazên xwe yên mafdar anîn ziman. Em dixwazin ku kedkarên perwerde û zanistê û xwendekar li kampusê bi awayekî herî azad bijîn û ji bo vî tiştî jî em ê têkoşîna xwe berdewam bikin. Eşkere ye ku saziyên dewletê li gorî daxwaza sendîkayekê biryara xwe naguherin; em tiştekî wiha zêde li bendê nînin. Lê ev rewş nabe asteng ku em têbikoşin û derbarê vê mijarê de raya giştî agahdar bikin. Mixabin sîstem ne demokratîk e, ji ber vê yekê nêrînên pêkhateyên zanîngehê, kedkarên perwerde û zanistê, xwendekaran û sendîkayan nayên girtin. Ji ber ku biryar ji jor ve tên girtin û eşkere ye ku ji jor ve jî tên bicihanîn.”













