Fermandarê Giştî yê HSDê Mazlûm Ebdî diyar kir ku dê beşdariya Rêveberiya Xweser di qonaxa siyasî de bi xwe çareseriyeke siyasî ji krîza Sûriyeyê re bîne û got: “Em ji bo agirbesteke mayînde têdikoşin.”
Fermandarê Giştî yê Hêzên Sûriya Demokratîk (QSD) Mazlûm Ebdî, ji kanala Ronahî TV re li ser dozên girîng ên li tevahî Sûriyeyê û herêmên Bakur û Rojhilatê Sûriyeyê bi taybet axivî. Mezlûm Ebdî bal kişand ser biryara bilindkirina ala serxwebûnê ya Sûriyeyê li ser tevahî saziyan û got: “Em parçeyek ji Sûriyeyê ne. Em al û sembolên Sûriyeyê qebûl dikin.”
Fermandar Mazlûm Ebdî behsa doza kantona Minbicê kir û wiha axivî: “Hêzên me li gorî agirbestê tev digerin, lê çeteyên dewleta Tirk li gorî wê tevnagerin û lihevkirinê binpê dikin.”
Mazlûm Ebdî xwest ku agirbest sibe anku roja înê bikeve pratîkê û diyar kir ku bi hêvî ye ev agirbesta li Minbicê veguhere agirbesteke giştî. Mazlum Ebdî da zanîn ku li gorî agirbestê divê tu hêzên leşkerî li Minbicê nemînin anku Minbic ji tevahî pêkhatên leşkerî were valakirin. Mazlûm Ebdî der barê êrişên li dijî gundewarê başûrê Kobanê de bi taybet li herêma Qerekozakê axivî ku hêzên wan bi lehengî parastina herêmê dikin. Mazlûm Ebdî anî ziman ku dewleta Tirk a ji ber êrişên xwe rastî zextên navneteweyî yên mezin hatin û bi her êrişeke Tirkiyê ya li ser Kobanê re dê berxwedana Kobanê ya dîrokî dubare bibe.
Mezlûm Ebdî destnîşan kir ku pêşkêşkirina wan ji bo vegerandina tirbeya Silêman Şah weke niyeta baş ji aliyê wan de bû. Mazlûm Ebdî der barê hebûna lihevkirinekê navbera wan û Heyet Tehrîr El Şam de li Heleb û Dêrazorê got armanca wan a hebûna li rojavayê Dêrazorê ew bû ku rê li pêş pêşketina DAIŞê bigirin. Ebdî aşkera kir ku bi destpêka êrişan re wan agahî ji “Heyet Tehrîr El Şam” wergirtin ku wê herêmên wan nabin armancê.
Fermandarê Giştî yê HSDê Mezlûm Ebdî aşkera kir ku agahiya Rûsyayê ji êrişa “Heyet Tehrîr El Şam” bi rêya Tirkiyeyê hebû û got: “Komên girêdayî Tirkiyeyê nikarin biryarekê bêyî vegera li Enqereyê bidin. Ji bo herêmên ku dewleta Tirk û çeteyên wê dagir kirine derfetên çareserkirinê hene. Em tu xeteriyê li ser ewlehiya Tirkiyeyê çênekin û em amade ne bi Tirkiyeyê re bikevin diyalogê. Dewleta Tirk hewl dide wan ji qonaxa siyasî bi dûr bixe. Ji bilî komên girêdayî Tirkiyeyê tu kes naxwaze şer li Sûriyeyê bibe. Ji her demê zêdetirî pêdivî bi yekitî û biratiya gelan heye. Ji ber guhê xwe ji hewldanen Rêveberiya Xweser a diyalogan re digirin krîza Sûriyeyê çareser nabe. Beşdariya Rêveberiya Xweser di qonaxa siyasî de dê bi xwe re çareserkirina krîza Sûriyeyê bîne. Divê helwesta Kurdan di qonaxa nû ya Sûriyeyê de yekgirtî be.”
