Komeleya Lêkolînên Ziman û Çandên Mezopotamyayê ya li Amedê şahiya belgedayinê li dar xist. Hevserokê MED-DERê Remzî Azîzoglû di şahiyê de axivî û wiha got: “Divê em di malên xwe de bi Kurdî biaxivin û zarokên xwe fêrî Kurdî bikin.”
Komeleya Lêkolînên Ziman û Çandên Mezopotamyayê (MED-DER) li Parka Ekîn Ceren a li ber avahiya wan a li navçeya Peyas a Amedê şahiya belgedayinê li dar xist. Nûnerên saziyên sivîl, partiyên siyasî, endam û rêveberên MED-DERê û gelek kes tev li şahiyê bûn. Şahî bi axaftina Hevserokê MED-DERê Remzî Azîzoglû dest pê kir.
‘Divê em xwedî li ziman, çand û hunera xwe derkevin’
Remzî Azîzoglû destnîşan kir ku ziman girîng e, nasname ye, hebûna wan e û wiha got: “Ji ber vê yekê divê em hemû xwedî li zimanê xwe derkevin. Di vê sedsalê de, em dibînin ku gelek zimanên din bi pêş dikevin, lê zimanê Kurdî hîn jî di asteke kêm de maye. Divê em, wekî Kurd, vê rewşê biguherînin. Em dikarin çawa vê yekê bikin. Divê em di malên xwe de, di civatên xwe de bi Kurdî biaxivin, divê em zarokên xwe fêrî Kurdî bikin û divê em xwedî li çand û hunera xwe derkevin.”
‘Em hemû zimanê xwe bi pêş bixin’
Remzî Azîzoglû diyar kir ku gelek kes dibêjin “em nikarin bi Kurdî biaxivin” an ‘Kurdî zimanekî zehmet e’ û ev tişt gotin: “Kurdî zimanekî dewlemend e, zimanekî xweş e. Tenê pêwîstiya me bi xebat û hewldanê heye. Ez hêvî dikim ku ev gotinên min bibin sedema hişyariyekê. Em hemû bi hevre xwedî li zimanê xwe derkevin û wî pêş bixin.”
Piştî axaftina Remzî Azîzoglû girseyê li ber stranên hatin lêxistin govend gerand. Dû re ji ber barîna baranê xwendekar derbasî komeleyê bûn û li wir belgeyên xwe yên serkeftinê girtin.
