Meclîsa Jinan a KESKê ya Amedê ji bo starta 25ê Mijdarê Roja Têkoşîna Li Dijî Tundiya Li Ser Jinan da û diyar kir ku ew ê li ber tundiyê serî rakin.
Meclîsa Jinan a KESKê ya Amedê ji bo starta 25ê Mijdarê Roja Tekoşîna Li Dijî Tundiya Li Ser Jinan li Şaxa Egîtim-Senê ya Hejmara 1an a civîna çapemeniyê li dar xist. Di civînê de pankarta “Jin Jiyan Azadî” hat daliqandin. Nûnerên rêxistinên jinan tev li civînê bûn. Endama Meclîsa Jinan a KESKê ya Amedê Guneş Ozel daxuyanî xwend. Balkêş bû ku daxuyanî tenê bi zimanê Tirkî hat xwendin.
Guneş Ozel bal kişand ser girîngiya 25ê Mijdarê û got ku ew ê wek her sal îsal jî bi rasthatina 25ê Mijdarê li dijî kuştin û tundiya li ser jinan serî rakin.
Guneş Ozel bernameya 25ê Mijdarê ya Meclîsa Jinan KESKê ya Amedê eşkere kir.
Bername bi vî rengî ye:
* Em ê ji bo Rojîn Kabaişê û hemû jinên hatine kuştin û tundî li wan hatiye kirin daxwaza edaletek rastîn bikin.
* Di 18ê Mijdarê de em ê ji bo hevalên xwe yên di girtîgehê de kartên piştgiriyê bişînin.
* Di 20ê Mijdarê de em ê li ber Dadgeha Cîzîrê bin, em ê li dijî destdirêjiya li ser zarokan tê kirin dengê xwe derxin û doza destdirêjiyê ya li Cizîrê bişopînin.
* Di 22yê Mijdarê de em ê serdana Dayikên Şemiyê bikin.
* Di 23yê Mijdarê de em ê tûra bisiklêtê ya jinan ji Parka Koşûyolûyê ber bi Meydana Şex Seîd ve li dar bixin.
* Di 25ê Mijdarê de em ê wekî pêkhateya Platforma Jinan a Dîcle Amedê meşa 25ê Mijdarê li dar bixin.
