Meclisa Jinan a DEM Partiyê û Hevşaredara Amedê Serra Bucak serdana gorên Rojîn Kabaîş û Narîn Guran kirin.
Bi pêşengiya Meclisa Jinan a DEM Partiyê bi wesîleya Cejna Remezanê serdana gorên jin û zarokên hatine kuştin, kirin. Berdevka Meclisa Jinan a DEM Partiyê Halîde Turkoglû, Hevşaredara Amedê Serra Bucak û gelek siyasetmedarên jin din di nav de serdana gora Rojîn Kabaîş a xwendekara zanîngehê ku li Wanê hat kuştin, Narîn Guran a li Amedê ji aliyê malbata xwe ve hat kuştin, kirin.
Jinan ewilî serdana gora Rojîn Kabaîş a li Goristana Yenîkoya Amedê kirin. Jinan ji dayika Rojîn Kabaîş re sersaxî xwestin û li ser gora Rojîn Kabaîş fatîha xwendin.
Jinên siyasetmedar paşê jî çûn ser gora Narîn Guran a li gundê Çûliyê ya ser bi navçeya Rezana Amedê ve. Li ser gora Narîn Guran fatîha hat xwendin.
Hevseroka DEM Partiya Amedê Gulşen Ozer û Berdevka Meclisa Jinan a DEM Partiyê Halîde Turkoglû li ser gorê axivîn.
‘Divê Narîn jî îro cejnê pîroz bikira’
Gulşen Ozer diyar kir ku divê zarok nemirin û neyên kuştin û wiha axivî: “Divê îro Narîn wekî her zarokekî ji xwe re bigeriya û cejnê pîroz bikira. Lê di emrê xwe yê biçûk de hat qetilkirin. Em dibêjin Narîn nemirî ye. Em ê her tim bi bîr binin.”
‘Têkoşîna me dê berdewam bike’
Halîde Turkoglu jî bi bîr xist ku têkoşîna wan ji bo jin û zarokan berdewam dike û got: “Di Tirkiyeyê de ewlehiya zarok û jinan tune ye. Em ê ji bo siberoja zarokan bi hêvî bin û dê têkoşîna me berdewam bike. Em ê li dijî vê zîhniyeta qirêj li ber xwe bidin û têkoşîna xwe bidomînin.”
