Komeleya Ekolojiyê ya Wanê li navçeya Westanê çalakiyek li dar xist. Di bernameyê de ji bo zarokan fîlmekî anîmasyon hat pêşandan û piştre jî panela “Jin û Ekolojî” li dar xist.
Komeleya Ekolojiyê ya Wanê, di çarçoveya xebatên xwe yên perwerdehî û hişmendiyê de, li navçeya Westanê çalakiyek li dar xist. Di çalakiya ku li salona Tamarayê pêk hat de pêşî ji bo zarokan fîlmekî anîmasyon pêşanda û piştre li ser têkiliya jin û xwezayê panelek li dar xist.
Ji bo zarokan sînemaya ekolojîk
Çalakî bi pêşandana fîlmekî anîmasyon ê li ser parastina xwezayê dest pê kir. Zarokên ku beşdarî bernameyê bûn, bi rêya sînemayê li ser girîngiya daristan û jiyana zindiyan hatin agahdarkirin. Armanca nîşandana fîlm hat diyarkirin ku avakirina hişmendiya ekolojîk di temenê piçûk de ye.
Panela ‘Jin û Ekolojî’
Piştî pêşandana fîlm, bi beşdariya çalakvanên ekolojiyê û nûnerên saziyan panelek bi sernavê ‘Jin û Ekolojî’ hat lidarxistin. Di panelê de bal kişandin ser keda jinê ya di parastina jîngehê de û hat destnîşankirin ku têkoşîna azadiya jinê û parastina ekolojiyê ji hev nayên qutkirin.
Ekolojîst Melîs Tantan û Hevseroka ÎHD a Wanê Ayten Kiran di panelê de axivîn û banga parastina xwezayê kirin.
Dûre endama ÎHDê Leyla Çakir axivî û bal kişand ser krîza ekolojîk a 20 salên dawî û got: “Pirsgirêkên ekolojîk herî zêde bandorê li ser jinê dikin. Jin û xweza wekî hevdu ne, jin wekî avê ye, wekî erdê ye. Dema ku mirov li xwezayê dinêre, ruhê jinê lê dibîne. Lê mixabin 20 sal in li ser xwezaya Kurdistanê talankirineke mezin heye. Bi çekan, bi şewitandina daristanan û bi koçberkirina mirovan re xwestin ku xweza bêxwedî bimîne.”
‘Heskîf mînaka qutkirina çandê ye’
Leyla Çakir destnîşan kir ku dewlet bi navê “projeyên zanistî” û bendavan dikeve herêmên hatine valakirin û wiha pê de çû: “Armanc li vir ne tenê çêkirina bendavan e. Mînaqa herî berbiçav Heskîf e. Bi van projeyan dixwazin çanda miletê me, huner û baweriya me qut bikin. Li Kurdistanê şerekî qirêj tê meşandin û dixwazin tu tişt li pey xwe nehêlin.”
Panel piştî pirs û bersivan bi dawî bû.
