Li navçeya Pawe ya Rojhilatê Kurdistanê pevçûn derket, di encama pevçûnê de 2 pasdarên Îranê hatin kuştin û 2 pasdar jî bi giranî birîndar bûn.
Piştî ku di rojên borî de Supayê Pasdarên Îranê derdora bajarê Bane bombebaran kir û li Mihabadê operasyona leşkerî dabû despêkirin, şeva borî jî li nêzî navçeya Pawe ya li devera Hewraman a Rojhilatê Kurdistanê pevçûnek derket.
Li gor agahiyên xwecihî heta saetên dereng yên şevê di navbera komek çekdar û hêzên rejîmê de pevçûn berdewam kiriye.
Li gor çapemeniya Îranê jî di encama pevçûnê de 2 pasdarên bi navên Xalid Xaldînya û Burhan Kirîsanî hatine kuştin û 2 pasdarên din jî bi giranî birîndar bûne.
Heta niha ti aliyek fermî di derbarê pevçûnê de daxuyanî nedane, lê li ser torên medya dijîtal komek bi navê (Xorî Hîwa) berpirsyartiya êrişa li dijî pasdarên Îranê girt ser xwe.
Hêjayî gotinê ye di rojên borî de Supayê Pasdarên Îranê bi sê balafirên bê mirov êrişî ser derdora gundê Şîwê ya ser bi navçeya Bane kiribû. Wê demê Yekîneyên Parastina Rojhilatê Kurdistanê (YRK) ragihandibû ku êrişên hatin kirin nayên qebûlkirin û ger dubare bibin, wê bersiva pêwîst were dayîn.
Piştre di 28ê hezîranê de jî YRKê bi daxuyaniyek ragihandibû ku Supayê Pasdarên Îranê li gundê Gageş û derdora Mihabadê operasyonek leşkerî dane despêkirin, di dema operasyonê de pevçûn derketiye.
