Li navçeya Mîlasê ya Muglayê, newroz bi çoşeke mezin hat pîroz kirin. Di pîrozbahiyê de Parlamentera DEM Partiyê ya Bedlîsê Semra Çaglar Gokalp bal kişand ser girîngiya yekîtiya neteweyî û got: “Kurd divê bêyî ku bikevin nava ferqa partî û îdeolojiyan, yekîtiya xwe ya neteweyî ava bikin; ev wekî wezîfeyekê li pêşiya me hemûyan e.”
Rêxistina Partiya Wekhevî û Demokrasiyê ya Gelan (DEM Partî) a Mîlasê, li cihê Bazara Akkentê pîrozbahiyeke girseyî li dar xist. Tevî parlamentera DEM Partiyê ya Bedlîsê Semra Çaglar Gokalp, nûnerên gelek saziyên sivîl û bi hezaran welatiyên ku bi cil û bergên xwe yên herêmî herikîn qada Newrozê û beşdarî pîrozbahiyê bûn. Bername bi deqeyeke rêzgirtinê dest pê kir û dirûşmên “Jin, jiyan, azadî”, “Bijî berxwedana Rojava”, “Newroz pîroz be” û “Bê Serok jiyan nabe” hatin berzkirin. Hunermend Rojkar jî bi stranên xwe reng da qadê.
Peyama Rêberê gelê Kurd Abdullah Ocalan hat xwendin
Hevserokên DEM Partiyê yên Muglayê Zuhal Macid û Mehmet Kaya û Hevserokên navçeya Mîlasê Berîvan İşçi û Hanîfî Yilmaz, girse silav kirin û Newroza gel pîroz kirin. Piştî axaftinên silavkirinê, Endamê Meclîsa DEM Partiyê Kadir Baydur, nameya Rêberê Gelê Kurd Abdullah Ocalan a ku ji Newroza Amedê re şandibû xwend.
‘Em qedera ji bo me hatî diyarkirin qebûl nakîn’
Parlamenter Semra Çaglar Gokalp di axaftina xwe de bal kişand ser şerê li Rojhilata Navîn û destwerdana hêzên emperyalîst û anî ziman ku Kurd û gelên herêmê li dijî vî şerî xwedî helwest in û got: “Em wekî Kurd û gelên herêmê, li dijî vî şerê ku li Îranê dest pê kiriye û li tevahiya erdnîgariyê belav dibe, xwedî sekneke dijber in. Gelên Rojhilata Navîn, bi taybetî jî Kurd, baş dizanin ku şer wêranî ye û tiştekî bi destê gelan naxe. Sînorên ku beriya sed salan bi pergarê (cetvelê) hatine diyar kirin me nas nekirin û îro jî gelê Kurd van sînoran qebûl nake. Kurd li dijî vî aqilê sînoran bi sedsalan e li ber xwe didin. Ew aqilê ku sînoran xêz dike, îro jî dixwaze pêşeroja Kurdan û gelan diyar bike. Em ji vir, ji Muglayê careke din diyar dikin: Me ew qedera ku ji bo me hatiye birîn tu carî qebûl nekir û em ê qebûl nekin.”
Semra Çaglar Gokalp, bal kişand ser pêvajoya aştiyê ya ku bi banga 27ê Sibatê ya Abdullah Ocalan dest pê kiribû û diyar kir ku aştî ji bo vê axê wekî av û nan hewce ye. Her wiha bal kişand ser rapora hevpar a di vê pêvajoyê de û got: “Wekî DEM Partî, me şerhek danî ser wê raporê. Ew şerh bi xwe, li dijî wê hişmendiya ku rastiya zimanê dayikê û nasnameya Kurd qebûl nake û pêvajoyê tenê di çarçoveya ‘ewlekariyê’ de dinirxîne, helwestek e. Têkoşîna me ya li dijî vê hişmendiyê hîn jî berdewam dike.”
Banga Yekîtiya Neteweyî
Semra Çaglar Gokalp destnîşan kir ku heta yekîtiya neteweyî ya Kurdan pêk neyê, li Rojhilata Navîn aştî pêk nayê û got: “Hêzên mezin her tim xwestin me parçe bikin. Berê sînorên me, paşê jî zihnên me parçe kirin. Xwestin me di nava neteweperestiya teng de asê bikin. Lê Kurd û dostên wan, her kesê ku alîgirê demokrasî û azadiyê ne, bi paradîgmaya Neteweya Demokratîk bersiva herî zelal di van qadên Newrozê de didin.”
Semra Caglar Gokalp axaftina xwe bi girîngiya nameya Newroza Amedê û ruhê Rojavayê bi dawî kir û got: “Nameya ku ji Newroza Amedê re hatî şandin, ne peyameke ji rêzê ye. Kurd divê bêyî ku li partî, îdeolojî û cudahiya ramanan binêrin, yekîtiya neteweyî ava bikin. Di dema pêvajoya Rojavayê Kurdistanê de Kurd li ser piyan bûn, ji bo parastina destkeftiyan li qadan bûn. Em neçar in ku wî ruhî li her derê û her demê biparêzin.”
Pîrozbahî bi stranên hunermend Rojkar û bi gerindana govendê bi dawî bû.
