Saziya Avê ya Kobanê daxuyand ku ji ber birîna elektrîkê 14 stasyonên ava vexwarinê ji xizmetê derketine.
Ambargoya li ser Kobanê didome. Ji ber dorpêçkirina herêmê welatî bi gelek pirsgirêkên jiyanê re rû bi rû ne. Yek ji pirsgirêka sereke jî pirsgirêka tinebûna avê ye.
Saziya Avê ya Kobanê li pêş Şaredariya Gel a Kobanê daxuyaniyek da. Daxuyanî ji aliyê hevseroka Saziya Avê Zozan Xelîl ve hate dayîn.
Di daxuyaniyê de hate gotin ku ji ber birîna elektrîkê 14 stasyonên avê nikarin bixebitin û nêzî 20 rojan e bajarê Kobanê û gundê wê bê av mane. Hate diyarkirin ku ev yek li ser jiyana 500 hezar kesî xetereyê çêdike.
Her wiha hate diyarkirin ku sozên têkildarî dayîna elekrtîkê hatine dayîn jî bi cih nehatine.
