ESPê di 100emîn roja girtina 85 sosyalîstan de li Îzmîrê çalakî li dar xist û bal kişand ser bêhiqûqiya li girtîgehan û bang li saziyên demokratîk kir ku li dijî faşîzmê mil bi mil têkoşînê mezin bikin.
Di daxuyaniyê de Hêzên Ked û Demokrasiyê yên Îzmîrê, gelek partiyên siyasî û rêxistin cih girtin. Beşdaran pankarta “Di roja 100emîn de ji sosyalîstên girtî re azadî” hildan û dirûşmên “Bila zindan bên rûxandin, ji girtiyan re azadî” û “Em hebûn, em hene, em ê hebin” berzkirin. Daxuyanî li ser navê partiyên beşdar, ji aliyê endamê ESPê Onder Aktaş ve hate xwendin.
Onder Aktaş diyar kir ku dê dorpêça faşîst bê şikandin û da zanîn ku di 3yê Sibatê li dijî saziyên sosyalîst ên ku ESP di navenda wan de ye, operasyoneke binçavkirin û girtinê hatiye kirin û got: “Hevserokê me yê Giştî Murat Çepnî jî di nav de , 85 sosyalîst hatin girtin. Îro roja 100emîn a girtina wan e. Rejîmê bi hedefgirtina partiya me dest bi ‘xurtkirina eniya hundir’ kir.”
‘Bi sosyalîstan re di nav piştevaniyê de bin’
Onder Aktaş da zanîn ku “şahidên veşartî” û îfadeyên îftirakaran wekî hinceta girtinê hatine nîşandan û wiha dewam kir: “Ev îftirakarên ku kesayetiya xwe firotine, îro di binçavkirinên li ser şaredariyên CHPê de jî tên dîtin. Ew rêgezên hiqûqê yên herî hêsan binpê dikin û bi derewan ji pêşeroja mirovan didizin. 100 roj derbas bûn, lê hê jî îdianameya piraniya hevalên me nehatine amadekirin. Divê dawî li van girtinan were û sosyalîstên girtî di zûtirîn dem de azad bibin. Em bang li hemû kes û saziyên şoreşger û demokrat dikin ku bi sosyalîstan re di nav piştevaniyê de bin.”
Daxuyanî piştî axaftinên nûnerên partî û rêxistinan, bi dirûşmên “Li dijî faşîzmê mil bi mil” û “Girtiyên şoreşger rûmeta me ne” bi dawî bû.
